मोसम नदीकाठावरील हातभट्ट्या उद्‌ध्वस्त; जायखेडा पोलिसांच्या कारवाईचे स्वागत

अंबासन/ अंतापूर : मोसम नदीकाठावर बिनबोभाट सुरू असलेल्या हातभट्ट्यांवर जायखेडा पोलिसांनी सायंकाळी गुप्त माहितीच्या आधारावर अचानक छापा टाकून दोन हातभट्टी चालकांविरुद्ध कारवाई केली. मोसम परिसरातील गावठी हातभट्ट्यांवर पोलिसांनी केलेल्या कारवाईचे नागरिकांकडून स्वागत केले जात आहे. (Latest Marathi News)

गेल्या अनेक दिवसांपासून मोसम नदीपात्रातून पुरपाणी खळखळून वाहत आहे. यातच नदीकाठावरील हिरव्यागार झाडांचा आडोसा घेऊन काही गावठी हातभट्टी चालविणाऱ्यांनी हातभट्ट्या बिनबोभाट सुरू केल्या होत्या. याबाबत जायखेडा पोलिस ठाण्यातील उपनिरीक्षक नवनाथ रसाळ यांना गुप्त माहितीच्या आधारावर सुगावा लागताच सहाय्यक पोलिस निरीक्षक श्रीकृष्ण पारधी यांच्या मार्गदर्शनाखाली पोलिस हवालदार गोपीनाथ भोये, पोलिस शिपाई जितेंद्र पवार यांनी मोसम नदीवरील धोबी घाटात शुक्रवारी (ता. १९) सायंकाळी साडेसहाच्या सुमारास छापा टाकला.

यात नदीकाठावर हातभट्टी सुरू असल्याचे निदर्शनास येताच उपनिरीक्षक रसाळ यांच्यासह कर्मचाऱ्यांनी घेराव घालून रोहिदास बारकू सोनवणे (वय ३०) व नायबू अभिमन मोरे (वय २८, दोघे रा. ताहाराबाद) यांच्या ताब्यातील गावठी हातभट्टीची दारू तयार करण्यासाठी लागणारे साहित्य, कच्चे रसायन व तयार दारू असा एकूण सात हजार रूपये किमतीचा मुद्देमाल जप्त केला. त्यांच्याविरुद्ध गुन्हा दाखल करण्यात आला आहे.

जायखेडा पोलिसांनी केलेल्या कारवाईमुळे परिसरातील अवैध हातभट्या चालविणाऱ्यांचे धाबे दणाणले असून, यापुढील काळात हातभट्ट्यांवर कठोर कारवाईचे संकेत जायखेडा पोलिसांकडून देण्यात आले आहेत.

''मोसम नदीकाठाजवळ अवैध हातभट्टी सुरू असल्याची गुप्त माहिती मिळताच कार्यवाही केली आहे. परिसरातील बिनबोभाट अवैध हातभट्ट्यांवर अशीच कारवाई केली जाईल.'' - श्रीकृष्ण पारधी, सहाय्यक पोलिस निरीक्षक, जायखेडा