बसमध्ये अग्निशमन यंत्रणेचा अभाव

यवतमाळ : नाशिक येथे अपघातात खासगी प्रवासी बस जळून खाक झाल्यानंतर उपप्रादेशिक परिवहन विभागाच्या (आरटीओ) अधिकाऱ्यांना जाग आली आहे. त्यांनी यवतमाळ येथील ट्रॅव्हल्स पॉइंटला भेट देऊन बसेसची पाहणी केली. या पाहणीत बसमध्ये अग्निशमन यंत्रणेचा अभाव दिसून आला. आता ही तपासणी नियमित सुरू राहणार असल्याची माहिती सूत्रांनी दिली.

नाशिक येथे झालेल्या अपघाताने लांब पल्ल्यावर धावणाऱ्या खासगी बस खरोखरच सुरक्षित आहेत का, असा प्रश्‍न निर्माण झाला आहे. अपघात होताच उपप्रादेशिक परिवहन विभागाला खडबडून जाग आली. त्यांनी बसी पाहणी केली. एकाही बसमध्ये अग्निशमन यंत्रणा आढळली नाही. यासंदर्भात संबंधितांना विचारणा केली असता, हीर यंत्रणा दुसऱ्या वाहनात असल्याचे उत्तर त्यांच्याकडून देण्यात आले.

अशाच प्रकारची अवस्था अनेक बसची आहे. वर्धा-नागपूर, अमरावती, पुसद मार्गावर धावणाऱ्या ट्रॅव्हल्समध्ये अपवादानेच अग्निशमन यंत्रणा आहे. आता बसेस प्रवासयोग्य आहेत का, बसची उंची, लांबी रुंदीची पाहणी करण्यात येत आहे. त्यात दोन बर्थमधील अंतर किती असले पाहिजे, याकडे लक्ष दिले जात आहे.

गाड्या मंजुरीसाठी येतात. त्यावेळी सर्व नियम पडताळून बघितले जातात. स्लिपर कोच वाहने लांब अंतरासाठी धावतात. त्यामुळे त्यांची तपासणी गांभीर्यपूर्वकच केली जाते.

- ज्ञानेश्‍वर हिरडे, उपप्रादेशिक परिवहन अधिकारी, यवतमाळ.