मालेगावच्या रुग्णाचा व्हॉटसऍपने लागला शोध.. समजले तेव्हा कुटुंबियांना धक्का! 

नाशिक / मालेगाव  : मालेगावातून हृदयविकाराच्या उपचारासाठी नाशिकच्या संदर्भ सेवा रुग्णालयात आलेल्या 57 वर्षीय रुग्ण कोरोना चाचणीत पॉझिटिव्ह आला. नाशिकला उपचारासाठी गेलेला रुग्ण महिना उलटूनही घरी न परतल्याने कुटूंबियांनी व्हॉटसऍपवरून त्यांचा शोध सुरू केला...अन् मग...

असा घडला प्रकार

गेल्या महिन्यात मालेगावातील 57 वर्षीय इसम स्थानिक डॉक्‍टरांकडे वैद्यकीय उपचारासाठी गेले असता, त्यांना हृदयविकारासंदर्भात नाशिक संदर्भ सेवा रुग्णालयात जाण्यास सांगितले होते. हलाखीची परिस्थिती असतानाही अनवानी आणि सोबतीला कोणतीही नसताना, कुटूंबियांना फक्त नाशिकला जाऊन येतो असे सांगून निघाले. कसाबसा ते संदर्भ सेवा रुग्णालयात पोहोचले. मात्र, तेथील वैद्यकीय अधिकाऱ्यांनी त्यांना जिल्हा रुग्णालयात जाऊन कोरोनाची चाचणी केल्यानंतर या असे सांगितल्याने ते जिल्हा रुग्णालयात आले. कोरोनाची चाचणी केली असता, दोन दिवसांनी ते कोरोना पॉझिटिव्ह आले. त्यामुळे त्यांना तात्काळ विशेष कोरोना कक्षात दाखल करून घेण्यात आले. त्यांच्याकडे संपर्कासाठीचे काहीही नव्हते. त्यामुळे त्यांना मालेगावात आपल्या कुटूंबियांशी संपर्कही साधता आला नाही. 

कुटुंबियांशी संपर्कच नाही 

तर, तिकडे मालेगावात कुटूंबिय महिना उलटून गेला तरीही नाशिकला गेलेला त्यांचा माणूस न परतल्याने हवालदिल झाले. शहरात कडेकोट लॉकडाऊनची स्थिती असल्याने शोध तरी कसा घ्यायचा असा प्रश्‍न उभा राहिला. अखेरिस कुटूंबियांनी त्यांचे छायाचित्र आणि त्याखाली बेपत्ता झाल्याचा मजकूराचा संदेश करून तो व्हॉटसऍपवरून व्हायरल केला. पाहता-पाहता तो व्हायरल संदेश नाशिकमध्ये पोहोचला. जुने नाशिकमधील सामाजिक कार्यकर्ते के. नज्मुल यांनी संदेशानुसार मालेगावातील काही समाजबांधवांशी संपर्क साधला. त्यावरून त्यांना काही माहिती मिळाली. त्यानुसार, त्यांनी संदर्भ सेवा रुग्णालय आणि त्यांनी जिल्हा रुग्णालय गाठले. त्यावेळी त्यांना ते 57 वर्षीय इसम कोरोना कक्षात असल्याचे समजले. महिनाभरापासून याठिकाणी उपचार घेत असलेले आणि त्यांच्या कुटूंबियांची कोणतीही माहिती मिळत नसल्याने तेही मानसिकदृष्ट्या खालावले होते. के. नज्मुल यांनी त्यांची भेट घेतली. त्यांना खाण्यापिण्यासह काही वस्तूंची खरेदी करून दिली. 

हेही वाचा > ह्रदय पिळवटून टाकणाऱ्या 'त्या' फोटोमागचे सत्य समजले.. तर तुमच्याही डोळ्यात येईल पाणी

कुटूंबियांनी मानले आभार
त्यांच्या डिस्चार्जची प्रक्रिया पूर्ण केल्यानंतर त्यांना मालेगावी पोहोच करण्याचीही व्यवस्था करून दिली. महिनाभरापासून थांगपत्ता नसलेला आपला माणूस घरी परत आल्याचे पाहून कुटूंबियांनीही के. नज्मुल यांचे आभार मानले. तसेच कोरोनासारख्या जीवघेण्या आजारातूनही ते मुक्त झाल्याचा कुटूंबियांनी आनंदही व्यक्त केला. 

हेही वाचा > मालेगावकरांनो..आकडा वाढत असला तरी दिलासादायक 'घटना'ही घडताहेत बरं का!