संतापजनक! उपसरपंचाकडूनच आशासेविकेला बेदम मारहाण...नेमके काय घडले?

नाशिक : (नांदगाव) 'क्वारंटाइनसाठी आमची नावे आरोग्य विभागाला का कळवली', अशी विचारणा करीत उपसरपंच व त्याच्या मुलाने आशा गटप्रवर्तक महिलेला मारहाण केल्याची धक्कादायक घटना रविवारी (ता. २६) मळगाव येथे घडली. सविस्तर प्रकार असा की... 

अशी आहे घटना

 तालुक्यातील मळगाव येथील दहा जण नाशिक येथे नातेवाइकाच्या अंत्यविधीसाठी गेले होते. अंत्यविधीसाठी गेलेल्यांनी गावात फिरू नका, तुम्ही तुमच्या घरातच क्वारंटाइन व्हावे, असे सांगून आशा कर्मचारीने ही बाब तालुक्याच्या आरोग्य विभागाला कळविली व व्हॉट्‍सॲप ग्रुपवरही माहिती टाकली. याचा राग आल्याने ग्यानदेव आहेर व त्यांचा मुलगा भाऊसाहेब यांनी  आशा गट प्रवर्तक रोहिणी आहेर व त्यांच्या पतीला शिवीगाळ व मारहाण केली. 

हेही वाचा > पुतणीला सतत टोमणे मारणे भोवले काकाला... केले  आत्महत्येस प्रवृत्त

गुन्हे दाखल करण्याची मागणी

दरम्यान, कोरोनाशी लढताना ग्रामीण भागात घरोघरी जाऊन सेवा देणाऱ्या नांदगावसह जिल्ह्यातील आशा कर्मचारी व गटप्रवर्तकांवर शारीरिक हल्ले वाढत असल्याने याबाबत संबंधितावर शासकीय कामात अडथळे आणल्याचे गुन्हे दाखल झाले पाहिजेत, अशी मागणी महाराष्ट्र राज्य आशा व गटप्रवर्तक संघटना नाशिक जिल्हा (आयटक संलग्न)चे नेते राजू देसले यांनी केली आहे. त्यांच्या नेतृत्वाखालील आशा कर्मचाऱ्यांचे शिष्टमंडळ जिल्हाधिकारी व जिल्हा पोलिसप्रमुखांना मंगळवारी भेट घेऊन निवेदन देणार आहे. 

हेही वाचा >  संतापजनक! मुलाला भेटायला गेलेल्या विवाहितेला सासरच्यांकडून बेदम मारहाण 

(संपादन - किशोरी वाघ)