नाशिकमध्ये मॉल सुरु करण्यास परवानगी; दुपारी चारपर्यंत राहणार सुरु

नाशिक : नागरिकांनी पाळलेल्या संयमातून पॉझिटिव्हिटी दर बऱ्यापैकी कमी झाला असला तरी, नाशिकला पूर्ण अनलॉक (Unlock) करता येणार नाही. येत्या सोमवार (ता.२१) पासून मॉल उघडण्यास परवानगी देण्यात आली असून, दुपारी चारपर्यत मॉल खुले राहतील. नागरिकांनी तिसऱ्या लाटेचा धोका कायम असल्याने दक्षता घ्यावी, असे आवाहन पालकमंत्री छगन भुजबळ यांनी केले. (malls will start from monday in nashik)

जिल्हाधिकारी कार्यालयातील मध्यवर्ती सभागृहात कोरोना आढावा बैठकीत ते बोलत होते. जिल्हाधिकारी सूरज मांढरे, महापालिका आयुक्त कैलास जाधव, पोलिस आयुक्त दीपक पांडे, मुख्य कार्यकारी अधिकारी लीना बनसोड, जिल्हा पोलिस अधीक्षक सचिन पाटील, जिल्हा शल्यचिकित्सक डॉ. अशोक थोरात, महापालिका वैद्यकीय अधिकारी डॉ. बापूसाहेब नागरगोजे, उपजिल्हाधिकारी वासंती माळी, निवासी वैद्यकीय अधिकारी डॉ. प्रशांत खैरे, वैद्यकीय अधिकारी डॉ. अनंत पवार, डॉ. निखिल सैदाणे, डॉ. उत्कर्ष दुधेडिया, डॉ. आवेश पलोड, डॉ. रवींद्र चौधरी आदी उपस्थित होते.

श्री. भुजबळ म्हणाले, की जिल्ह्यात एकूण ६२ ऑक्सिजन प्रकल्पातून साधारण १५५ टन ऑक्सिजन निर्मिती होणार आहे. ४०० टन ऑक्सिजन निर्माण करण्याचे नियोजन सुरू आहे. शासकीय रुग्णालयातील अतिदक्षता विभागांची कामे लवकर पूर्ण करावीत. दुसऱ्या लाटेत रुग्णांमध्ये तयार झालेली प्रतिकार शक्ती तपासण्यासाठी सर्वेक्षण करण्यात यावे. तिसऱ्या लाटेचा धोका लक्षात घेता, त्या अनुषंगाने आवश्यक असणारा औषधसाठा करण्याचे नियोजन करावे.

तिसऱ्या टप्यातील निर्बंध लागू

‘ब्रेक द चेन’ अंतर्गत तिसऱ्या टप्प्यातील निर्बंध लागू असून, शॉपिंग मॉल सोमवार ते शुक्रवार दुपारी चारपर्यंत सुरू ठेवण्यासाठी परवानगी दिली आहे. या मॉलमधील कर्मचाऱ्यांची आरटीपीसीआर चाचणी आवश्यक असून, तेथील कर्मचाऱ्यांचे लवकर लसीकरण करावे. तसेच तेथे जास्त गर्दी होणार नाही याची दक्षता घ्यावी. म्युकरमायकोसिसच्या रुग्णांची संख्यादेखील वाढत होत आहे. महापालिका रुग्णालयातील ऑपरेशन थिएटर तयार करण्याचा प्रस्ताव राज्य शासनाकडे पाठविण्यात येणार आहे, असे जिल्हाधिकारी श्री. मांढरे यांनी सांगितले. (malls will start from monday in nashik)