Nashik News : मनमाडला वाहतूक कोंडीचा त्रास; नगिना मशिदीजवळ तयार झाला ब्लॅक स्पॉट

Nashik News : मनमाड- येवला मार्गावर असलेल्या पुलाच्या दुरुस्तीचे काम युद्धपातळीवर सुरू आहे. मात्र जाण्यास येण्यास दुसरा पर्यायी मार्ग नसल्याने नागरिकांची मोठी गैरसोय होत आहे. त्यामुळे पुलाचे काम सुरू असले तरी मोकळ्या जागेतून मिळेल तेथून दुचाकी न्यावी लागत असल्याने मोठी वाहतूक कोंडी निर्माण होत आहे.

नागरिक वैतागले असून कधी होणार यापुलाचे काम असा प्रश्न विचारीत आपली उद्विग्नता व्यक्त करीत आहेत. (Manmad suffer from traffic jam near Nagina Masjid nashik news)

मनमाड- येवला मार्गावर असलेला पुलाची संरक्षक भिंत एका बाजूने कोसळल्यामुळे तो वाहतुकीस बंद करून पुलाच्या दुरुस्तीचे काम तातडीने सुरू करण्यात आले आहे. आमदार सुहास कांदे यांनी प्रयत्न करत या पुलासाठी तीन कोटी रुपये मंजूर करून आणले असून पुलाचे काम युद्ध पातळीवर सुरू आहे.

मात्र पूल बंद असल्याने शहराचे दोन भाग झाले आहे. जाण्यास येण्यास दुसरा कुठलाच पर्यायी मार्ग उपलब्ध नसल्याने नागरिकांची मोठी गैरसोय झाली आहे. त्यामुळे दोन्ही भागातील नागरिकांना पायी जावे लागत आहे. विशेष म्हणजे वयोवृद्ध लोकांना अधिक त्रास जाणवत आहे. त्यामुळे दुचाकी तरी जाण्यासाठी जागा द्यावी अशी मागणी नागरिकांनी केली होती. परंतु काम सुरू असल्याने दोन्ही बाजूंचे मार्ग बंद करण्यात आले आहे.

नागरिकांची गैरसोय होत असल्याने पुलावरून जाण्यास येण्यास मोकळ्या जागेतून मिळेल तेथून नागरिक पुलावरून जात आहे. त्यामुळे नगिना मशिदीजवळ मोठी वाहतूक कोंडी निर्माण होत आहे. याबाबत फुले शाहू आंबेडकर मुस्लीम विचार मंचचे कार्याध्यक्ष फिरोज शेख, जावेद मन्सुरी यांनी वाहतूक कोंडीची दखल घेऊन प्रशासनाकडे मागणी केली आहे.

त्यांनी म्हटले आहेस की गेल्या काही महिन्यांपूर्वी कोसळलेल्या रेल्वे ओव्हर ब्रीजचा काही भाग आजपासून दुचाकी वाहनांना सुरू करून देण्यात आले. पण हे करण्यापूर्वी कुठल्याही प्रकारचे नियोजन प्रशासन तथा पोलिसा यंत्रणेने घेतली नाही. त्यामुळे नगिना मशिदीसमोर वाहतुकीची दुतर्फा कोंडी वाढली आहे. दुचाकी चालकांमध्ये हाणामारी, राडा होताना दिसत आहे. तातडीने याठिकाणी दोन्ही बाजूस वाहतुकीस आळा घालण्यासाठी पोलिस नेमण्यात यावा अशी मागणी त्यांनी केली आहे.