Nashik Pune Railway : पुणे-नाशिक रेल्वे शिर्डीमार्गे नको : आमदार सत्यजित तांबे

Nashik Pune Railway : पुणे-नाशिक सेमी हायस्पीड रेल्वेमार्गाच्या मूळ आराखड्यात बदल करत हा मार्ग संगमनेर तालुक्याऐवजी शिर्डीकडे वळविण्याचा निर्णय राज्य सरकारने घेतला आहे. या निर्णयामुळे संगमनेरकरांमध्ये प्रचंड नाराजी असून आमदार सत्यजित तांबे यांनी याच असंतोषाला वाचा फोडली आहे. मूळ आराखड्यानुसार हा मार्ग संगमनेर तालुक्यातून जाणे अपेक्षित असताना ऐनवेळी हा बदल का केला, असा प्रश्न उपस्थित करत आमदार तांबे यांनी मुख्यमंत्री एकनाथ शिंदे आणि उपमुख्यमंत्री देवेंद्र फडणवीस यांची भेट घेतली.

रेल्वेमार्गाच्या मूळ आराखड्यात कोणताही बदल न करता तो संगमनेरमधूनच न्यावा, अशी आग्रही मागणी करणारे पत्र त्यांनी दिले. पुणे-नाशिक या दोन महानगरांना जोडणारा रेल्वेमार्ग महारेलच्या माध्यमातून उभारण्याचा निर्णय राज्य सरकारने घेतला. हा मार्ग संगमनेर तालुक्यातून जाण्याचे नियोजन झाले आहे.

या रेल्वेमार्गामुळे पुण्यातील चाकण, भोसरी आणि नाशिक जिल्ह्यातील सिन्नर आणि मुसळगाव या चार औद्योगिक वसाहती जोडल्या जाणार आहेत. त्यामुळे संगमनेर तालुक्यातील तरुणांना रोजगाराच्या संधी अधिक प्रमाणात उपलब्ध होणार आहे. संगमनेरमधील फळे, भाजीपाला, धान्य हा माल थेट महानगरांमध्ये अधिक जलद पोचणार आहे.

तब्बल तीन दशकांनी संगमनेर देशाच्या रेल्वेच्या नकाशावर येणार असल्याचे आमदार तांबे यांनी उपमुख्यमंत्री फडणवीस यांच्या निदर्शनास आणून दिले. राज्य सरकारने महारेलच्या माध्यमातून सिन्नर व संगमनेर तालुक्यात भूसंपादनही केले आहे. एकट्या संगमनेरमधून १०३ खरेदीखतांद्वारे थेट शेतकऱ्यांकडून जमिनी खरेदी केल्या.

असे असताना अचानक या मार्गात बदल करत तो संगमनेरऐवजी राजगुरू नगरवरून थेट शिर्डीकडे वळविण्याचा निर्णय का घेतला, याबाबतही तांबे यांनी उपमुख्यमंत्र्यांसोबत चर्चा केली. आमच्या भागासाठी हा महत्त्वाचा रेल्वेमार्ग आहे. त्यामुळे मूळ आराखड्यात बदल न करता हा मार्ग संगमनेरवरूनच न्यावा, अशी मागणी आ. तांबे यांनी केली आहे.

बदल कोणाच्या सूचनेनुसार?

ज्या मार्गासाठी केंद्रीय अर्थसंकल्पात २ हजार ४२४ कोटी रुपयांची तरतूद झाली आहे. ज्या मार्गासाठी एकट्या संगमनेर तालुक्यातील १०३ शेतजमिनी खरेदीखत देत ताब्यात घेतल्या, तो मार्ग ऐनवेळी शिर्डीमार्गे वळविण्याचा निर्णय राज्य सरकारने कोणाच्या सूचनेनुसार घेतला, असा प्रश्नही आ. तांबे यांनी उपस्थित केला. मूळ आराखडा बदलून अचानक एखादा रेल्वे प्रकल्प दुसऱ्या मार्गाने वळवणे सोपे असते का, याबाबतचा शक्यता अहवाल तपासण्यात आला का, असे अनेक प्रश्न आ. तांबे यांनी उपस्थित केले. (latest marathi news)