नाशिकमध्ये मनसेच्या माजी जिल्हाध्यक्षांचं अकाली निधन

मागील काही दिवसांपासून मनसे प्रमुख राज ठाकरे (Raj Thackeray) यांचे नाव चांगलेचं चर्चेत आले आहे. राजकीय वर्तुळात केलेल्या काही वक्तव्यांमुळे त्यांच्यावर टीका होत आहे. दरम्यान, आता मनसे संदर्भातील एक बातमी समोर येत आहे. नाशिक (Nashik) येथील मनसेचे माजी जिल्हाध्यक्ष अनंता सूर्यवंशी यांचं ह्रदयविकाराच्या झटक्याने निधन झालं आहे. आज सकाळी अचानक त्यांचा हृदयविकाराच्या झटक्यानं त्यांचा मृत्यू झाला. ते ४८ वर्षांचे होते. त्यांच्या अशा अकाली निधनानं संपूर्ण राजकीय क्षेत्रात आणि मनसेमध्ये शोककळा पसरली आहे. (MNS anant suryavanshi)

मिळालेल्या माहिती अशी, सुर्यवंशी हे सकाळी मॉर्निंग वॉकसाठी गेले. तिथून परतल्यानंतर त्यांनी स्विमिंग केलं आणि पूलमधून बाहेर येताच त्यांना हृदयविकाराचा झटका आला. ही बाब इतरांच्या लक्षात येताच सूर्यवंशी यांना तातडीने खासगी रुग्णालयात दाखल करण्यात आलं. परंतु डॉक्टरांनी त्यांना मृत घोषित केलं. सूर्यवंशी यांच्या जाण्यामुळे मनसेतला एक सच्चा नेता हरवला अशी प्रतिक्रिया येत आहे. कमी बोलणारे पण सतत पक्षासाठी काम करणारे निष्ठावान नेते अशी त्यांची ओळख होती. त्यामुळे सूर्यवंशी यांच्या अशा जाण्यामुळे सर्वांनाच धक्का बसला आहे.

दरम्यान, अनंता सूर्यवंशी हे मनसेच्या स्थापनेपासूनच पक्षात सदैव कार्यरत होते. ते राज ठाकरे यांचे अतिशय जवळचे नेते होते. सूर्यवंशी यांनी पंचवटी परिसरातून नगरसेवक पददेखील भूषवलं होतं. ग्रामीण भागात तब्बल ५ वर्ष ते मनसेचे जिल्हाध्यक्ष होते.