Monkey Funeral : टेहरे ग्रामस्थांकडून माकडावर अंत्यसंस्कार

मालेगाव (जि. नाशिक) : टेहरे (ता. मालेगाव) येथे झाडावरून पडल्याने माकडाचे निधन झाले. गेल्या तीन महिन्यापासून माकड गावात राहत होते. शनिवारी (ता.१८) सकाळी हिंदू रितीरिवाजानुसार मयत माकडावर अंत्यविधी करण्यात आला. यावेळी ग्रामस्थ मोठ्या संख्येने उपस्थित होते. (Monkey funeral by Tehre villagers nashik news)

टेहरे गावात लंगूर जातीचे माकड तीन महिन्यापासून राहत होते. शुक्रवारी रात्री (ता.१७) वीजेच्या कडकडाटासह पाऊस पडत असल्याने हा माकड सोमेश्‍वर मंदिराजवळील चिंचेच्या झाडावरून पडल्याने त्याचा मृत्यू झाला.

माकडाचा गावात मृत्यू झाल्याने त्याचा अंत्यविधी व उत्तरकार्याचा कार्यक्रम करण्याचा निर्णय ग्रामस्थांनी घेतला. ग्रामस्थांनी एखाद्या व्यक्तीप्रमाणे हिंदू धर्मातील प्रथेनुसार माकडावर अंतिम संस्कार केले.

माकडाची गावातून अंत्ययात्रा काढण्यात आली. तीन महिन्यापासून राहत असलेल्या माकडाशी गावकऱ्यांची मैत्री झाली होती. माकडाने या काळात लहान मुले, महिला व ग्रामस्थांना कुठलाही त्रास दिला नाही. गावातील सर्व नागरिकांनी पैसे गोळा करून माकडावर अंतिम संस्कार केला.

अंत्यविधीच्या मिरवणुकीत अख्खा गाव जमा झाला होता. तत्पूर्वी माकडाची पशुवैद्यकीय अधिकारी डॉ. जावेद खाटीक यांनी तपासणी केली. माकड वयोवृद्ध असल्याचे त्यांनी सांगितले. ३० मार्चला माकडाचा तेरावे तसेच उत्तरकार्याचा कार्यक्रम ग्रामस्थांनी ठेवला असल्याची माहिती रवींद्र शेवाळे यांनी दिली.

हेही वाचा : अदानी..हिंडेनबर्ग आणि भविष्य....

यावेळी तंटामुक्तीचे अध्यक्ष प्रशांत शेवाळे, पंचायत समितीचे माजी सदस्य अरुण पाटील, चंद्रकांत शेवाळे, दिनेश शेवाळे, पोलिस पाटील नीलेश पाटील, तसेच वन विभागाचे वनरक्षक योगेश पाटील व ग्रामस्थ उपस्थित होते.

माकडाचा पुतळा बसवणार

टेहरे येथील माकडाच्या चितेस गावातील तंटामुक्तीचे अध्यक्ष प्रशांत शेवाळे यांनी अग्निडाग दिला. ग्रामस्थ १३ दिवस दुखवटा पाळणार आहेत. अंत्यविधी झालेल्या जागेवर माकडाचा पुतळा बसविणार असल्याचे पंचायत समितीचे माजी सदस्य अरुण पाटील यांनी सांगितले.