नाशिक : शहरात यंदा २०० मतदान केंद्रे वाढणार

नाशिक : 3 उमेदवारांना एक मतदानासाठी दीड मिनिट वेळ लागणार, असे गृहीत धरून महापालिका निवडणुकीसाठी (Nmc Election) मतदारयादी तयार करण्याची प्रक्रिया सुरू झाली आहे.

आधी कोरोना आणि त्यानंतर ओबीसी आरक्षणाच्या लढाईमुळे पुढे गेलेल्या निवडणुकीची तयारी महापालिका प्रशासनाने सुरू केली आहे. मतदार यादीची जुळवाजुळव केली जात असून, निवडणूक प्रक्रियेसाठी लागणाऱ्या एकूण सुमारे १० हजार मनुष्यबळाचे नियोजन केले आहे. शहरात यंदा २०० मतदान केंद्रे वाढणार असून, २१२ झोनल अधिकाऱ्यांची गरज लागणार आहे. त्यादृष्टीनेही प्रशासन तयारी करीत आहे.

महापालिकेने (nmc) जिल्ह्यातील विविध खासगी, तसेच शासकीय शाळा, महाविद्यालय आदी सुमारे चारशे संस्थांना पत्र देत मनुष्यबळाची मागणी केली होती. काहींच्या याद्या वेळेत न मिळाल्यामुळे त्यांना दुसरी नोटीस बजावण्यात घेऊन कारवाईचा इशारा दिल्यानंतर सर्व संस्थांनी यादी महापालिकेला दिली आहे.

महापालिका प्रशासन सुमारे १६०० मतदान केंद्रे तयार करणार असून, त्यासाठी विविध प्रकारचे २१२ झोन (विभाग) तयार करून प्रत्येक झोनवर एक अधिकाऱ्यावर जबाबदारी निश्चित केली आहे. एका मतदान बूथ केंद्रावर एकूण पाच सेवक राहणार आहेत. यासाठी यादी तयार करण्यात आली आहे. दरम्यान, महापालिका प्रशासनाने शहरातील एकूण ४४ प्रभागांसाठीची मतदारयादी जोडण्याचे काम सुरू केले आहे.