नाशिक : मनपा रुग्णालय कर्मचारी कोरोना विळख्यात

नाशिक : गेल्या बावीस महिन्यांपासून कोरोना रुग्णांना अहोरात्र सेवा देणाऱ्या महापालिका रुग्णालयातील अनेक कर्मचाऱ्यांना (Municipal hospital staff) कोरोनाने घेरल्याने त्याचा (Corona positive) परिणाम रुग्ण सेवेवर होताना दिसत आहे. परंतु, वैद्यकीय विभागाकडून या विषयावर कानावर हात ठेवले आहे.

कठडा येथील डॉ. झाकिर हुसेन रुग्णालय, नाशिक रोड येथील नवीन बिटको रुग्णालय, मोरवाडी येथील श्री स्वामी समर्थ रुग्णालय, पंचवटीतील इंदिरा गांधी रुग्णालय ही महापालिकेची चार मोठी रुग्णालये आहेत. गेल्या बावीस महिन्यांपासून अपूर्ण मनुष्यबळात येथील कर्मचारी कोरोना रुग्णांना सेवा देत आहे. एका कर्मचाऱ्यावर दोन ते तीन जणांचा कार्यभार असताना महापालिकेकडून भरती होत नाही. या परिस्थितीत अत्यावश्यक सेवा म्हणून रुग्णालयातील कर्मचारी सेवा देत आहेत. परंतु, कोरोना तिसऱ्या लाटेमध्ये रुग्ण संख्या दोन हजारांच्या पुढे गेली असताना त्यात महापालिकेच्या रुग्णालयांमध्ये वैद्यकीय सेवा देणाऱ्या कर्मचाऱ्यांना कोरोनाने घेरले आहे. त्याचा परिणाम रुग्ण सेवेवर होत आहे.

प्रत्येक रुग्णालयात पंधरा ते वीस कर्मचारी कोरोनाबाधित आहे. वैद्यकीय विभागाने मात्र या विषयावर कानावर हात ठेवले आहे. कोरोना पार्श्‍वभूमीवर महापालिकेच्या वैद्यकीय विभागाच्या ३४८ रिक्तपदे भरण्यास नगरविकास विभागाने मान्यता दिली आहे. वैद्यकीय अधीक्षक, निवासी वैद्यकीय अधिकारी, सहाय्यक वैद्यकीय अधिकारी, वैद्यकीय अधिकारी, वैद्यकशास्त्र तज्ञ, शल्यचिकित्सक, स्रीरोगतज्ज्ञ, क्ष- किरणतज्ज्ञ, बधिरीकरण तज्ज्ञ, अस्थिव्यंग तज्ज्ञ, नेत्र शल्यचिकित्सक, हेडनर्स, स्टाफनर्स, एएनएम, मिश्रक, प्रयोगशाळा तंत्रज्ञ, वॉर्डबॉय आदी रिक्तपदे भरण्याची मागणी होत आहे.