नाशिक : डोक्यात दगड घालून शेतमजूराचा खून

सटाणा : शहरालगत असलेल्या कंधाणे फाट्यासमोरील शेतात डोक्यात दगड घालून शेतमजूराचा खून करण्यात आल्याची घटना आज रविवार (ता. ३) रोजी सकाळी उघडकीस आली आहे. घमजी रंगनाथ माळी (वय ५०, रा.पिंगळवाडे) असे शेतमजूराचे नाव आहे. दरम्यान, या घटनेमुळे शहर व तालुक्यात खळबळ उडाली असून सटाणा पोलिस ठाण्यात खुनाचा गुन्हा दाखल करण्यात आला आहे.

बाजारासाठी बाहेर गेले अन्...

याबाबत पोलिस सूत्रांनी दिलेल्या प्राथमिक माहितीनुसार, मोरेनगर (ता.बागलाण) येथील शेतकरी जितेंद्र सोनवणे यांच्या शेतात घमजी रंगनाथ माळी (वय ५०) गेल्या काही वर्षांपासून शेतमजूर म्हणून काम करत होते. काल शनिवार (ता.२) रोजी सटाणा येथे आठवडे बाजार असल्याने बाजार करण्यासाठी घमजी माळी हे घराबाहेर पडले होते. रात्री उशिर झाला तरी पती घरी न परतल्याने त्यांच्या पत्नी चिंतेत होत्या. त्यांनी पतीचा सर्वत्र शोध घेतला, मात्र ते कुठेही आढळून आले नाहीत.

मृतदेह बघताच बघ्यांना घाम फुटला

आज रविवार (ता.३) रोजी सकाळी आठ वाजता शहरालगत असलेल्या कंधाणे फाट्यासमोरील विलास दादाजी सोनवणे यांच्या शेताजवळ घमजी माळी यांचा छिन्नविछिन्न अवस्थेतील रक्ताच्या थारोळ्यातील मृतदेह आढळून आला. अतिशय निर्घृणपणे त्यांचा खून करण्यात आला होता. ओळख पटू नये म्हणून दगडाने त्यांचा चेहरा ठेचण्यात आला आहे. मृतदेहाशेजारीच खुनात वापरलेला मोठा दगड पडला होता. सकाळी छिन्नविछिन्न अवस्थेतील मृतदेह बघताच बघ्यांना भीतीमुळे घाम फुटला. त्यांनी तत्काळ सटाणा पोलिस ठाण्याशी संपर्क साधून घटनेची माहिती दिली.

घटनेची माहिती मिळताच पोलिस निरीक्षक सुभाष अनमुलवार, सहाय्यक पोलिस निरीक्षक किरण पाटील, पोलिस हवलदार हेमंत कदम, जिभाऊ पवार, अजय महाजन, भास्कर बस्ते, प्रकाश शिंदे यांनी घटनास्थळी धाव घेत पाहणी केली. यावेळी बघ्यांनी एकच गर्दी केली होती. यानंतर उत्तरीय तपासणीसाठी मृतदेहास येथील ग्रामीण रुग्णालयात शवविच्छेदनास पाठविण्यात आले. दरम्यान, या खुनामध्ये कुणाचा हात असावा, त्यामागील उद्देश काय असावा यासंदर्भात पोलिस निरीक्षक सुभाष अनमुलवार अधिक तपास करीत आहेत.