Nashik Accident Prone Areas: जिल्ह्यात 139 अपघात प्रवण क्षेत्रे! उपाययोजनांचा आढावा सादर करण्याचे जिल्हाधिकाऱ्यांचे आदेश

Nashik Accident Prone Areas : अपघात प्रणव क्षेत्रात काय उपाययोजना करण्यात आल्या, याविषयीचा मागील तीन वर्षांचा आढावा सादर करण्याचे आदेश जिल्हाधिकारी जलज शर्मा यांनी दिले. जिल्ह्यात १४६ ब्लॅक स्पॉट आणि १३९ अपघात घडण्याची शक्यता असलेली ठिकाणे आहेत. (139 accident prone areas in district)

जिल्हाधिकारी कार्यालयात अपघाताच्या ठिकाणांबाबत मंगळवारी (ता. २४) आढावा बैठक घेण्यात आली. महापालिकेचे माजी आयुक्त डॉ. चंद्रकांत पुलकुंडवार यांनी दिलेल्या सूचनांनुसार शहरालगतच्या ब्लॅक स्पॉटवर त्रिस्तरीय पाहणी केली होती. त्यात प्रामुख्याने पीडब्ल्यूडी, पोलिस, आरटीओ, महापालिका यांनी विशेष पाहणी केली होती.

प्रत्यक्षात या ठिकाणांवर शॉर्ट टर्म उपाययोजना करण्याचे काम करण्यात आले होते. समितीनुसार गतिरोधक करणे, पेंट्स लावणे, ‘नो एन्ट्री’चे नियोजन करणे यांसारख्या उपाययोजना करण्याच्या सूचना दिलेल्या होत्या. या कामांचा आढावा घेण्यासाठी ‘ब्लॅक स्पॉट’वर शासनाकडून इंजिनिअरिंग टीम, आरटीओ, पोलिस यांना काम करण्याचे निर्देश असतात.

जिल्हाधिकारी जलज शर्मा यांनी आढावा घेतल्यावर पोलिस प्रशासन, आरटीओ, पीडब्ल्यूडी, नाशिक महापालिका प्रशासनाला या ‘ब्लॅक स्पॉट’वर केलेल्या उपाययोजना, त्यांचे मिळालेले रिझल्ट याचा सविस्तर आढावा दहा दिवसांत सादर करण्याचे निर्देश दिले. (latest marathi news)

बैठकीला नाशिक आरटीओचे प्रादेशिक अधिकारी प्रदीप शिंदे, उपप्रादेशिक अधिकारी विनोद जाधव, सार्वजनिक बांधकाम विभागाच्या अधीक्षक अभियंता अरुंधती शर्मा, कार्यकारी अभियंता राहुल पाटील, ‘न्हाई’तर्फे दिलीप पाटील, शशांक आडके, नाशिक महापालिकेचे रवी बागूल, ‘एमएसआरडीसी’चे कार्यकारी अभियंता रंजना दळवी आदी उपस्थित होते.

‘ब्लॅक स्पॉट’ म्हणजे काय?

ज्या ठिकाणांवर उपाययोजना केल्यावरही सातत्याने अपघात होतात, तसेच अपघात झाल्यावर उपाययोजना केल्यावरही तीन वर्षांत त्या ठिकाणी अपघात होणे अथवा दहा जणांपेक्षा जास्त मृत होणे, त्या ठिकाणांना ‘ब्लॅक स्पॉट’ म्हणून गणले जाते.