Nashik MAHAGENCO: महानिर्मितीतर्फे 15 मेगावॉटच सौर वीज खरेदी-विक्री करार; साक्री-1 प्रकल्पातील विजेबाबत प्रथमच करार

Nashik MAHAGENCO : औष्णिक वीज उत्पादन क्षेत्रातील अग्रगण्य अशा महानिर्मिती कंपनीने वीज उत्पादनासोबतच वीज वितरण क्षेत्रात दमदार पाऊल टाकले असून, धुळे जिल्ह्यातील महानिर्मितीच्या २५ मेगावॉट स्थापित क्षमतेच्या ‘साक्री-१ सौरऊर्जा’ प्रकल्पाची वीज वितरण करण्यासाठी १५ मेगावॉट क्षमतेचा वीज खरेदी-विक्री करार मेसर्स एसईझेड बायोटेक सर्व्हिसेस प्रायव्हेट लिमिटेड (वीज वितरण परवानाधारक) यांच्या समवेत करण्यात आला. ()

महानिर्मितीचे अध्यक्ष तथा व्यवस्थापकीय संचालक डॉ. पी. अन्बलगन, संचालक (वित्त) बाळासाहेब थिटे, संचालक (प्रकल्प) अभय हरणे, मुख्य अभियंता (सौरऊर्जा) संजय कुऱ्हाडे, महाव्यवस्थापक हर्षल भास्करे, तर एसईझेड बायोटेक (सायरस पुनावाला ग्रुप)तर्फे कार्यकारी संचालक केदार गोखले, मुख्य कार्यकारी अधिकारी वंदना येरमाळकर (इरो पॉवर) यांच्या उपस्थितीत हा करार करण्यात आला.

महानिर्मितीतर्फे प्रथमच खासगी वीज वितरण परवानाधारक संस्थेसमवेत हा वीज विक्री करार करण्यात आला आहे. महानिर्मितीने मेसर्स एसईझेड बायोटेकच्या मांजरी एसईझेड ६ मेगावॉट आणि हडपसर एसईझेड ९ मेगावॉटकरिता निविदा स्पर्धेत सहभागी होऊन ही निविदा जिंकली. मे. एसईझेड बायोटेक सर्व्हिसेस प्रायव्हेट लिमिटेड मांजरी आणि हडपसर या दोन्ही एसईझेडकरिता महानिर्मितीकडून ही वीज खरेदी-विक्री केली जाणार आहे. (latest marathi news)

या करारासाठी एसईझेड बायोटेक (सायरस पुनावाला ग्रुप)तर्फे इरो पॉवर या वितरण प्रणाली ऑपरेटर कंपनीने महत्त्वपूर्ण भूमिका बजावली आहे. एसईझेड बायोटेक सर्व्हिसेस प्रायव्हेट लिमिटेड ही मांजरी आणि हडपसर या दोन्ही एसईझेडची विकासक असून, येथे सिरम इन्स्टिट्यूटसारख्या अग्रगण्य लस उत्पादक कंपन्यास्थित आहेत.

आठ हजार मेगावॉट वाढीचे उद्दिष्ट

वाढते औद्योगिकीकरण, लोकसंख्या, तापमानवाढ आणि निसर्गाची अवकृपा लक्षात घेता महानिर्मितीने औष्णिक वीज उत्पादनाकडून आता नवीकरणीय ऊर्जा क्षेत्रात २०३० पर्यंत आठ हजार मेगावॉट प्लस क्षमता वाढ करण्याचा निश्चय केला आहे. त्याकरिता सौरऊर्जा, पवनऊर्जा, उदंचन जलविद्युत प्रकल्प, ग्रीन हायड्रोजन प्रकल्प, कोल गॅसिफिकेशन, सरकुलर इकॉनॉमीसारखे अभिनव उपक्रम तथा ऊर्जा प्रकल्प विषयक कामांना प्राधान्य देऊन गती देण्यासाठी महानिर्मिती प्रयत्नशील आहे.