Nashik News : प्लास्टिक पिशव्या वापरणाऱ्या आस्थापनांवर दंडात्मक कारवाई; पंचवटीत 25 हजारांचा दंड वसूल

Nashik News : पंचवटी विभागीय कार्यालय हद्दीत प्लास्टिक पिशव्या वापरणाऱ्या आस्थापनांवर दंडात्मक कारवाईची मोहीम राबविण्यात येत आहे. या अंतर्गत सोमवारी (ता.२९) ८० आस्थापनांची तपासणी केली. याप्रसंगी सिंगल युज प्लास्टिक वापर करताना आढळून आलेल्या ५ आस्थापनांवर दंडात्मक कारवाई करीत त्यांच्याकडून २५ हजार रुपयांचा दंड वसूल केला. तसेच ६ किलो प्लास्टिक पिशव्या जप्त केल्याची माहिती विभागीय स्वच्छता निरीक्षक संजय दराडे यांनी दिली. (25 thousand fine for plastic bag )

प्लास्टिक व अविघटनशील वस्तूंचे उत्पादन, वापर, विक्री, वाहतुकीवर राज्यात बंदी आहे. तरीही अनेक ठिकाणी प्लास्टिकचा सर्रास वापर केला जातो. त्याअनुषंगाने पंचवटी विभागीय अधिकारी मदन हरिचंद्र, विभागीय स्वच्छता निरीक्षक संजय दराडे यांच्या सूचनेनुसार पंचवटी विभागातील पथकामार्फत मोहीम राबविण्यात आली. या मोहिमेत विभागातील ८० आस्थापना येथे सिंगल युज प्लास्टिक वापराबाबत तपासणी केली.

या तपासणीदरम्यान ५ आस्थापना सिंगल युज प्लास्टिक वापर करताना आढळून आल्याने पहिला गुन्हा ५ हजार रुपये प्रमाणे २५ हजार रुपये दंड वसूल करून ६ किलो प्लॅस्टिक पिशव्या जप्त केल्या. मोहीम सुरू राहणार असून, व्यावसायिक तसेच नागरिकांनी पर्यावरणास बाधा निर्माण होणार नाही, यासाठी प्लास्टिक पिशवीचा वापर टाळावा, असे आवाहन करण्यात आले. मोहिमेत स्वच्छता निरीक्षक जितेंद्र परमार, सुशील परमार, प्रमोद बागूल, राकेश साबळे, सागर रेवर, ओम खैरनार व वाहनचालक संजय जाधव यांचा सहभाग होता.