Nashik Accident News : काकडगावजवळील रखडलेल्या पुलामुळे अपघात! 2 ठार, तर 3 गंभीर जखमी

अंबासन : नामपूर, मालेगाव रस्त्यावरील काकडगावनजीक गेल्या अनेक महिन्यांपासून रखडलेल्या पुलाच्या कामाने दोन निष्पाप तरूणांचा जीव घेतला व दोन जण गंभीर जखमी झाले असून संतप्त नातेवाईक व ग्रामस्थांनी काकडगाव प्रवेशद्वाराजवळील रस्त्यावर रास्ता रोको आंदोलन छेडले व जोपर्यंत संबधित ठेकेदारावर मनुष्यवधाचा गुन्हा दाखल होत नाही तोपर्यंत रस्त्यावरून हलणार नाही असा संतप्त पवित्रा घेतला. (Accident due to stuck bridge near Kakadgaon)

मंगळवार (ता.११) रात्री साडे अकराच्या सुमारास मोराणे (ता.बागलाण) येथील भुषण प्रभाकर गांगुर्डे (वय ४२) रा. मोराणे (ता.बागलाण), दिनेश हिरामन रौंदळ (वय ४४) बिजोरसे (ता.बागलाण), वेदांत रामचंद्र शेवाळे (वय २८), कुदंन कृष्णा शेवाळे (वय २०) दोघे रा. मोराणे हे नामपूरहून मोराणेकडे जात असताना काकडगावनजीक रखडलेल्या पुलावर आले असता पिकअपने जोरदार धडक दिली.

यात भुषण गांगुर्डे व दिनेश रौंदळ यांचा जागीच मृत्यू झाला तर वेदांत शेवाळे व कुदंन शेवाळे गंभीर जखमी झाले आहेत. अपघाताची माहिती मिळताच परिसरातील नागरिकांनी धाव घेतली व नामपूर येथील ग्रामीण रुग्णालयात दाखल करण्यात आले. जखमी दिनेश व वेदांत यांना पुढील उपचारासाठी मालेगाव येथे हलवण्यात आले आहे.

सकाळी नामपूर ग्रामीण रुग्णालयात नातेवाईक व ग्रामस्थांनी मोठी गर्दी केली होती. या पुलाचे काम ठेकेदाराच्या मनमानी कारभारामुळेच रखडल्याने अपघात घडत असून सदर ठेकेदारावर मनुष्यवधाचा गुन्हा दाखल करावा यासाठी संतप्त नातेवाईक व ग्रामस्थांनी थेट ज्या ठिकाणी अपघात झाला तेथे रास्ता रोखो आंदोलन छेडले आहे. (latest marathi news)

आंदोलनात काकडगाव, मोराणे, बिजोरसे, अंबासन, उत्राणे येथील ग्रामस्थ उपस्थित आहेत. जायखेडा पोलिस ठाण्याचे पोलीस निरीक्षक पुरूषोत्तम शिरसाठ घटनास्थळी कर्मचाऱ्यांसह दाखल झाले आहेत. 

रस्त्यावर पुलाची मागणी नसतांनाही पुल बांधकाम का केला. पुल केला पण चुकीच्या पध्दतीने केला असल्याचा आरोप आंदोलन कर्त्यानी केला आहे. या पुलाची सखोल चौकशी व्हावी व आम्हाला न्याय मिळावा अशी मागणी आंदोलन कर्त्यानी केली आहे. जोपर्यंत दखल घेतली जात नाही मृतदेह ताब्यात घेणार नाही असा पवित्रा उपस्थिती आंदोलकांनी घेतला आहे.