Nashik ZP News : 2 महिन्यांनी जि. प. चे विभागप्रमुख फिल्डवर

Nashik ZP News : जिल्हा परिषदेच्या मुख्य कार्यकारी अधिकारी आशिमा मित्तल यांनी मुख्यालयातील सर्व विभागप्रमुखांना फिल्डवर उतरवत तालुक्यांना बैठका घेण्याचे आदेश काढले होते. त्यानुसार डिसेंबर महिन्यातील दुसऱ्या मंगळवारी सर्व पालक अधिकाऱ्यांनी दिलेल्या तालुक्यात जाऊन बैठका घेत, कामकाजाचा आढावा देखील प्रशासनाकडे सादर केला होता. मात्र त्यानंतर जानेवारी व फेब्रुवारी महिन्यात हा बैठकांकडे त्यांनी पाठ फिरविली. (Nashik After 2 months ZP Head of Department on field marathi news)

प्रशासनाला आता पुन्हा जाग आली असून, बुधवारी (ता. २०) सर्व विभागप्रमुख फिल्डवर होते. त्र्यंबकेश्वर पंचायत समितीत कार्यालयीन वेळात कर्मचाही हजर नसल्याचे निदर्शनास आले होते. हा विषय जिल्हाभर गाजला होता. त्या वेळी श्रीमती मित्तल यांनी मुख्यालयातील सर्व विभागप्रमुखांची प्रत्येक तालुक्यास ‘तालुका पालक अधिकारी’ म्हणून नेमणूक करत बैठका घेण्याचे फर्मान काढले होते. (latest marathi news)

जानेवारीमध्ये तालुका पालक अधिकाऱ्यांना बैठकांचा विसर झाला. त्या वेळी पंतप्रधान नरेंद्र मोदी यांचा जिल्हा दौरा असल्याचे कारण पुढे केले होते. फेब्रुवारी महिन्यातही अधिकारी तालुक्यांना गेले नव्हते. जिल्हा परिषद अध्यक्ष करंडक स्पर्धा, अधिकारी, कर्मचारी क्रीडा स्पर्धा, आचारसंहितेच्या पार्श्वभूमीवर कामांची लगीनघाई यामुळे फिल्डवर गेले नसल्याचे सांगितले जात होते. प्रामुख्याने निधी खर्च वेळात व्हावा, यासाठी प्रशासनाकडून तालुक्यांना पाठविण्यात आल्याचे बोलले जात आहे.