Nashik Monsoon : प्रदीर्घ विश्रांतीनंतर वरुणराजा बरसला; दिवसभर रिपरिप

Nashik Monsoon : प्रदीर्घ विश्रांतीनंतर नाशिक शहर व जिल्ह्यात पावसाचे पुनरागमन झाले आहे. रविवारी (ता. २१) रात्रीपासून सुरू असलेल्या संततधार पावसामुळे अनेक ठिकाणी पाणी साचले होते. आठवड्याच्या पहिल्याच दिवशी सोमवारी शासकीय कामानिमित्त बाहेर पडलेल्या नागरिकांची दिवसभराच्या रिमझिम पावसामुळे तारांबळ उडाली. दरम्यान, दिवसभरात १७.७ मिलीमिटर पावसाची नोंद झाली आहे. (After long time rain in city )

त्र्यंबकेश्‍वर व इगतपुरी या धरणांच्या तालुक्यात दिवसभर पाऊस पडल्यामुळे धरणसाठ्यात अल्पशी वाढ झाली आहे. गेल्या पंधरा दिवसांपासून पावसाने दडी मारली होती. पावसाअभावी पिके जळण्याच्या मार्गावर होती. त्यांना काही प्रमाणात दिलास मिळाला. मात्र, सोमवारी जिल्ह्यात पुन्हा पावसाला सुरुवात झाली. जिल्ह्यातील त्र्यंबकेश्‍वर, इगतपुरी, दिंडोरी, नाशिक, निफाड, सिन्नर, येवला, नांदगाव, मालेगाव, देवळा, चांदवड, कळवण, सुरगाणा या तालुक्यात पावसाला सुरुवात झाली आहे.

नाशिक शहर व परिसरातही रिमझिम पाऊस झाला आहे. सोमवारी दिवसभर पावसाची संततधार सुरू होती. त्यामुळे नागरिकांची चांगलिच तारांबळ उडाल्याचे दिसून आले. घराबाहेर पडलेल्या नागरिकांना छत्री, रेनकोटच्या साह्याने प्रवास करावा लागला. तर ठिकठिकाणी पावसाचे पाणी साचलेले दिसून आले. (latest marathi news)

शाळा, महाविद्यालयांतील विद्यार्थ्यांना पावसात भिजावे लागले. तर बेघर नागरिकांनी उड्डाणपुलाचा आश्रय घेतला. दिवसभराच्या रिपरिप पावसामुळे वातावरणात गारवा निर्माण झाला होता. सायंकाळी थंडी वाढल्याचे जाणवले.दरम्यान, येत्या २४ तासांत पावसाचा जोर कायम राहण्याची शक्यता हवामान खात्याने वर्तवली आहे.

ठिकठिकाणी पाणी साचले

नाशिक शहर व परिसरात सोमवारी (ता.२२) सकाळपासून हलक्या पावसाला सुरुवात झाली. दुपारी तीन वाजेनंतर मात्र चांगलाच जोर धरला. या पावसामुळे शहरातील नाशिक रोड, पंचवटी, सातपूर, सिडको परिसरात ठिकठिकाणी पाणी साचल्याचे दिसून आले. दिवसभर संततधार सुरु होती. यामुळे जनजीवन विस्कळीत झाले आहे. तर जागोजागी पाण्याची डबकी साचली होती. त्यातच दुपारी पावसाने जोर धरल्याने शाळकरी मुलांचे चांगलेच हाल झाले.