Nashik Assembly Constituency : मध्य विधानसभा मतदारसंघात धोक्याची घंटा! महाविकास आघाडीकडून मोर्चेबांधणी

Nashik News : लोकसभा निवडणुकीतील विधानसभा मतदारसंघातील मतदानाचे आकडे बाहेर पडल्यानंतर त्यातून नाशिक शहरातील मध्य विधानसभा मतदार संघात धोक्याची घंटा वाजली आहे. नाशिक लोकसभा मतदारसंघांमध्ये नाशिक पश्चिम, पूर्व, देवळाली, सिन्नर व इगतपुरी हे सहा विधानसभा मतदारसंघ येतात. लोकसभेच्या एकूण मतदारसंघापैकी चार मतदार संघ हे शहरी भागात असल्याने या शहरी भागातील मतदार ठरवितात तोच खासदार निवडून येतो. (Nashik Assembly Constituency)

शहरी भागामध्ये जवळपास १२ लाख मतदार आहे. त्यामुळे यंत्राचा शहरी भागातील नागरिकांचा कल काय आहे, यावर महायुतीच्या उमेदवाराचे गणित अवलंबून होते. पूर्व, मध्य व पश्चिम या मतदारसंघांमध्ये भाजपचे आमदार आहेत, तर देवळाली विधानसभा मतदारसंघांमध्ये राष्ट्रवादी काँग्रेसच्या अजित पवार गटाचे आमदार आहे.

इगतपुरीमध्ये काँग्रेसचे आमदार आहे, तर सिन्नरमध्ये राष्ट्रवादी काँग्रेसच्या अजित पवार गटाचे ॲड. माणिक कोकाटे हे आमदार आहेत. त्यामुळे नाशिक लोकसभा मतदारसंघांमध्ये महायुतीचे पारडे जड दिसत होते. मात्र मतपेटीतून मतदारांनी धोक्याची घंटा दिली आहे.

पूर्व व पश्चिम मतदारसंघामध्ये मागील निवडणुकीच्या तुलनेत लीड कमी असला तरी महायुतीच्या उमेदवाराने येथे आघाडी घेतली आहे. मध्य विधानसभा मतदारसंघामध्ये मात्र महायुतीच्या लीडची वजाबाकी झाल्याने विधानसभा निवडणुकांमध्ये महायुतीसाठी धोक्याची घंटा वाजल्याचे बोलले जात आहे. (latest marathi news)

२०१९ मध्ये १ लाख तीन हजारांचा लीड

पश्चिम विधानसभा मतदारसंघांमध्ये २०१९ मध्ये जवळपास १ लाख तीन हजारांचा लीड होता. तो लीड यंदा मिळाला असला तरी जवळपास ८० हजार मतांची घट झाली आहे. पूर्व विधानसभा मतदारसंघात दहा हजार तीनशे मतांचा लीड महायुतीच्या उमेदवाराला मिळाला आहे. येथे लीड कमी असला तरी येथे महायुतीला संधी दिसून येते.

सिन्नर विधानसभा मतदारसंघांमध्ये महाविकास आघाडीचे राजाभाऊ वाजे यांना विक्रमी लीड मिळाल्याने विधानसभा निवडणूक महाविकास आघाडीसाठी सोपी तर महायुतीसाठी अडथळे निर्माण करणारे ठरू शकते.