Assembly Election : राज्यात ‘भाकप’चा 15 जागांवर दावा; राज्यस्तरीय बैठक

Assembly Election : विधानसभा निवडणुकीच्या पार्श्‍वभूमीवर भारतीय कम्युनिस्ट पक्षाची नाशिकमध्ये सुरू असलेल्या राज्यस्तरीय पदाधिकाऱ्यांच्या बैठकीत राज्यात ‘भाकप’ला किमान १५ जागा मिळाव्यात, असा प्रस्ताव ठेवण्यात आला आहे. यासंदर्भात महाविकास आघाडीच्या ज्येष्ठ नेत्यांशी संवाद साधून जागावाटपाचा प्रश्‍न सोडविण्यात येणार आहे. दरम्यान, कुठल्या जिल्ह्यातील कोणत्या मतदारसंघात निवडणूक लढवायची, याविषयीचा अंतिम निर्णय समिती बुधवारी (ता. २४) घेणार आहे. (BCP claims 15 seats in State level meeting )

भारतीय कम्युनिस्ट पक्षाच्या राज्य कौन्सिल सदस्यांचे तीनदिवसीय अधिवेशन मंगळवार (ता. २३)पासून नाशिक शहरातील राणेनगर येथील राज्य सरकारी कर्मचारी मध्यवर्ती संघटनेच्या कार्यालयात सुरू झाले आहे. ‘भाकप’चे राष्ट्रीय सचिव डॉ. भालचंद्र कांगो, राज्य सचिव ॲड. सुभाष लांडे, सहसचिव डॉ. राम बाहेती, सहसचिव राजू देसले, तुकाराम भस्मे, नामदेव चव्हाण, स्मिता पानसरे, शिवकुमार गणवीर, प्रकाश रेड्डी, सुकुमार दामले, राजन क्षीरसागर, श्याम काळे अधिवेशनात सहभागी आहेत. (latest marathi news)

मंगळवारी दिवसभर झालेल्या बैठकीत प्रामुख्याने विधानसभा निवडणुकीवर चर्चा झाली. यात जिल्ह्यानिहाय जागांचे प्रस्ताव समितीकडे प्राप्त झाले आहेत. भारतीय जनता पक्षाला हरवण्यासाठी राज्यात इंडिया आघाडी मजबूतपणे लढली पाहिजे. यादृष्टीने महाविकास आघाडीने घटक पक्षांना विश्‍वासात घेऊन त्यांनाही विधानसभेच्या जागा दिल्या पाहिजे, असा सूर मान्यवरांकडून व्यक्त करण्यात आला. राज्यातील कोणत्या मतदारसंघात निवडणूक लढवायची, याबाबतचा निर्णय बुधवारी होणाऱ्या बैठकीत घेतला जाणार आहे. जातीनिहाय जनगणना करा व आरक्षणाची मर्यादा ५० टक्क्यांवर वाढवण्यासाठी लवकरच राज्यभर आंदोलन झाले. त्याचा पुढील टप्पा ठरविण्यात येणार आहे.