Nashik Bribe Crime : बदापूर ग्रामपंचायत सदस्य रामनाथ देवडे लाच घेताना जाळ्यात

Nashik Bribe Crime : चिचोंडी खुर्द ग्रुप ग्रामपंचायतींतर्गत असणाऱ्या बदापूर येथील शाळा कामाच्या तक्रारी न करण्याच्या बदल्यात ग्रामपंचायत सदस्य रामनाथ देवडे यांनी १५ हजार रुपयांची लाच (Bribe) स्वीकारली. भ्रष्टाचार प्रतिबंध कायद्यान्वये कारवाई करून त्यांना अटक करण्यात आली. (Nashik Bribe Crime)

जिल्हा परिषदेच्या बदापूर शाळेला प्रधानमंत्री श्री निधीतून ७.३० लक्ष रुपये मंजूर झाले असून, या निधीतून शाळेत सुशोभीकरण व परसबागेचे काम सुरू आहे. याबाबत चिंचोडी खुर्द व बदापूर ग्रुप ग्रामपंचायतचे सदस्य रामनाथ उमाजी देवडे (वय ५२) यांनी ग्रामपंचायतीच्या माध्यमातून कामात अडथळा न आणण्याच्या मोबदल्यात जिल्हा परिषद शाळेच्या शालेय समितीच्या अध्यक्षांकडे बुधवारी (ता. १४) २० हजार रुपयांची मागणी केली.

तडजोडी अंती १५ हजार रुपये घेण्याचे ठरले. ती रक्कम स्वीकारताना देवडे यांना पकडण्यात आले. भ्रष्टाचार प्रतिबंध अधिनियम, १९८८ चे कलम ७ प्रमाणे त्यांच्याविरुद्ध गुन्हा दाखल करण्यात आला. लाचलुचपत प्रतिबंधक विभागाचे पोलिस निरीक्षक नाना सूर्यवंशी यांच्या मार्गदर्शनाखाली हवालदार सचिन गोसावी, अविनाश पवार यांनी ही कारवाई केली.

दरम्यान, गावोगावी ग्रामपंचायतीच्या विकासकामांतील तक्रारी पुढे येत आहेत. मात्र, पकडला तो ‘चोर’ आणि पकडला जात नाही, तो ‘साव’, असे चित्र असल्याने सर्वत्र विकास निधी आणि त्यातील गंमतीजमतीची चौकशी होण्याची अपेक्षा सर्वसामान्यांतून व्यक्त होत आहे.