Nashik News : सख्ख्या चुलत बहिणींचा बंधाऱ्यामध्ये बुडून मृत्यू! कातरणीची घटना, तिसरीला वाचविण्यात यश

येवला : कातरणी येथे धुणे धुण्यासाठी गेलेल्या दोन सख्ख्या चुलत बहिणींचा गुरुवारी (ता.३) सायंकाळी पाचच्या सुमारास बंधाऱ्याच्या पाण्यात बुडून मृत्यू झाला. तिसऱ्या मुलीला वाचविण्यात यश आले आहे. या घटनेने कातरणी परिसरावर शोककळा पसरली आहे. (cousins ​​drowned in dam at katarni)

कातरणी-विसापूर रस्त्यावर गावालगत असलेल्या बंधाऱ्याच्या बाजूला पाचशे फुटांवर दत्तू सोनवणे यांची वस्ती आहे. या बंधाऱ्यालगत त्यांच्या मुली शेळ्या चारण्यासह धुणे धुण्यासाठी नेहमी जात असतात. गुरूवारी सायंकाळी दत्तू सोनवणे यांच्या मुली कल्याणी, तेजल, आदिती तसेच बंधू सोमनाथ सोनवणे यांची मुलगी ऋतुजा या बंधाऱ्याकडे धुणे धुण्यासाठी गेल्या होत्या.

पाचवीत शिकणारी ऋतुजा सोमनाथ सोनवणे (वय११) आणि सहावीत शिकणारी कल्याणी दत्तू सोनवणे (वय१२) यांना पाण्याचा अंदाज न आल्याने त्या बंधाऱ्याच्या पाण्यात बुडाल्या. आपल्या बहिणी बुडत असल्याचे पाहून तेजल (१४) हिने पाण्यात उतरून त्यांना वाचविण्याचा प्रयत्न केला, मात्र तीही पाण्यात गटांगळ्या खाऊ लागली.

याच दरम्यान रस्त्याने जाणाऱ्या ग्रामस्थांनी तिला पाण्यातून बाहेर काढले. इतर दोघीही बुडाल्याचे उशिरा लक्षात आल्याने त्यांना बाहेर काढेपर्यंत त्यांचा मृत्यू झाला होता. पाण्यातून काढलेल्या तेजल हिच्यावर ग्रामस्थांनी प्राथमिक उपचार व पोटातून पाणी काढून तातडीने मनमाड येथे डॉ. शिंगी यांच्या रुग्णालयात दाखल केले. वेळेत उपचार मिळाल्यामुळे तिची तब्येत सध्या व्यवस्थित आहे. (latest marathi news)

वर्षातील दुसरी घटना

गरीब शेतकरी कुटुंबातील या मुली गावातीलच प्राथमिक तसेच माध्यमिक विद्यालयात शिकत होत्या. या घटनेने संपूर्ण गावातून शोक व्यक्त होत आहे. दरम्यान रात्री नऊच्या दरम्यान कातरणी येथे शोकाकूल वातावरणात या मुलींवर अंत्यसंस्कार करण्यात आले. दरम्यान, सोमनाथ सोनवणे यांचा अडीच वर्षाचा मुलाचा देखील आठ महिन्यापूर्वीच झोळीतून पडून मृत्यू झाला होता. वर्षाच्या आतच घरात दुसरी घटना घडल्याने कुटुंबीयांवर दुःखाचा डोंगर कोसळला आहे.