Nashik Crime News : चाडेगाव गोळीबार प्रकरणी दोघांना अटक

Nashik Crime News : चाडेगाव फाटा येथील गोळीबार प्रकरणी नाशिक रोड पोलिसांनी दोघांना अटक केली असून, अद्यापही मुख्य संशयित सचिन मानकर पोलिसांच्या हाती लागलेला नाही. पोलिस त्याचा कसून शोध घेत आहेत. चाडेगाव गोळीबार प्रकरणात नाशिक रोड पोलिसांनी सतीश सांगळे, सूरज वाघ या दोघांना अटक केली असून, मुख्य संशयितासह अन्य अद्यापही फरारी आहेत. (Nashik Crime 2 arrested in Chadegaon firing case)

चाडेगाव येथील काशाई यात्रोत्सवासाठी घेण्यात आलेल्या बैठकीनंतर चाडेगाव फाटा येथे संशयित सचिन मानकर याने फिर्यादी व त्याचा चुलत भाऊ ज्ञानेश्वर मानकर याच्यावर गोळ्या झाडल्या होत्या. यात एक गोळी ज्ञानेश्वरच्या पाठीत घुसली. खासगी रुग्णालयात त्याच्यावर उपचार सुरू असून, या प्रकरणी नाशिक रोड पोलिसांत गुन्हा दाखल करण्यात आला आहे.

नाशिक रोड पोलिसांनी या प्रकरणी संशयित सूरज वाघ आणि सतीश सांगळे या दोघांना अटक केली आहे; तर सचिन मानकर याच्यासह नाना हुळहुळे, महेंद्र मानकर, गोकुळ मानकर, आकाश पवार, अमोल नागरे, नंदू नागरे हे संशयित फरारी आहेत. मुख्य संशयित सचिन मानकर हा सराईत गुन्हेगार असून, त्याच्या विरोधातील गुन्ह्यांची माहिती संकलित केली जात आहे.