Nashik Crime News : वाहन जाळपोळीच्या घटनेतील 5 जणांना अटक

Nashik News : जुने नाशिक भागातील तीन विविध ठिकाणी वाहन जाळपोळीची घटना घडून आठ दिवस उलटले असले तरी जाळपोळीचे कारण अद्याप स्पष्ट होऊ शकले नाही. मात्र पोलिसांनी यातील तीन संशयित यांना शनिशिंगणापूर तर दोघांना शहरातून अटक केली. मुख्य संशयित अद्याप फरार असून पोलिस त्याचा शोध घेत आहे. (5 people arrested in incident of vehicle arson)

गुरुवारी (ता.१६) रोजी रात्री सव्वातीनला सहा संशयितांकडून तीन विविध ठिकाणी दहशत माजविण्याचा प्रयत्न करत १५ वाहने जाळली होती. या घटनेनंतर भद्रकाली गुन्हे शोध पथक संशयितांच्या मागावर होते. मात्र, सीसीटीव्ही फुटेज व्यतिरिक्त कुठलाही ठोस सुगावा पोलिसांकडे नव्हता.

मोबाईल लोकेशन, तांत्रिक विश्लेषण तसेच गोपनीय माहितीच्या आधारे संशयितांची माहिती प्राप्त करण्याचा प्रयत्न केला असता शनिशिंगणापूर येथे संशयितांचे लोकेशन दिसून येत होते. त्यानुसार वरिष्ठ पोलिस निरीक्षक गजेंद्र पाटील, पोलिस निरीक्षक संतोष नरुटे, विक्रम मोहिते यांच्या मार्गदर्शनात सहाय्यक पोलिस निरीक्षक गुन्हे सत्यवान पवार.

पोलिस उपनिरीक्षक यशवंत गांगुर्डे, हवालदार नरेंद्र जाधव, सतीश साळुंखे, संदीप शेळके तसेच कय्युम सय्यद, लक्ष्मण ठेपणे, अविनाश जुंद्रे, महेश बोरसे, नितीन भामरे, नारायण गवळी, सागर निकुंभ, धनंजय हासे, नीलेश विखे, योगेश माळी, दयानंद सोनवणे, जावेद शेख यांनी शनिशिंगणापूर येथे सापळा रचून सनी संजय गावडे (वय.२८,रा. पिंपळे गल्ली म्हसरूळ), प्रशांत बाळासाहेब फड (वय.३१,रा. विद्यानगर मखमलाबाद).

प्रवीण बाळू कराटे (वय.२४,रा. विद्यानगर मखमलाबाद) तिघांना ताब्यात घेतले. तर शहरातून आकाश राजू साळुंके,(वय.२४,रा. दत्त चौक सिडको), विजय सुरेश लोखंडे (वय.२८,रा. आडगाव) अशा पाच जणांना ताब्यात घेतले. त्यांची कसून चौकशी केली केली असता गुन्ह्याची कबुली दिल्याची माहिती उपायुक्त किरण कुमार चव्हाण, सहाय्यक पोलिस आयुक्त डॉ. सिद्धेश्वर धुमाळ यांनी दिली.

सुपारी घेऊन जाळपोळ ?

भद्रकाली पोलिसांनी ताब्यात घेतलेल्या पाचही संशयितांची चौकशी करण्यात आली. मात्र त्यांनी जाळपोळ का केली पूर्णपणे सांगितले नाही. जाळपोळीनंतर आम्हाला पैसे मिळणार होते. अद्याप पैसे मिळालेले नाही. अशी कबुली संशयितांनी पोलिसांना दिली. या घटनेतील मुख्य संशयित अद्याप फरार आहे. त्याची अटक होताच आगीचे नेमके कारण स्पष्ट होणार आहे.