Nashik Crime News : दागिने अपहारप्रकरणी आडगावकर, गोडसेंना अटक

Nashik Crime News : दागिन्यांचा अपहार करून एक कोटी १७ लाखांची फसवणूक केल्याप्रकरणी अंबड पोलिसांनी श्‍याम आडगावकर या सराफ व्यावसायिकासह शंकर गोडसे यांना अटक केली आहे. नाशिक जिल्हा व सत्र न्यायालयाने त्यांना पोलिस कोठडी सुनावली आहे. याप्रकरणी सहा संशयितांविरोधात गुन्हा दाखल करण्यात आला आहे. (Nashik Crime arrested in jewelry embezzlement case marathi news)

पोलिसांच्या माहितीनुसार, गिरीश पोतदार (६०, रा.अश्विन नगर, सिडको) यांनी व त्यांच्या नातेवाइकांच्या सोने, चांदीच्या दागिन्यांचा अपहार झाल्याचा दावा फिर्यादीत केला आहे. त्यानुसार एक कोटी १७ लाख ८४ हजार रुपयांच्या अपहाराचा गुन्हा सहा संशयितांविरुद्ध नोंद आहे.

त्यामध्ये श्याम आडगावकर, महेश आडगावकर, सागर आडगावकर, शंकर पंडित गोडसे, मयूर शहाणे, राजेंद्र शहाणे या संशयितांचा समावेश आहे. त्यांपैकी संशयित श्याम आडगावकर आणि शंकर गोडसे यांना गुरुवारी (ता.२२) रात्री दहा वाजेच्या सुमारास अटक करण्यात आली. वरिष्ठ पोलिस निरीक्षक दिलीप ठाकूर यांच्या मार्गदर्शनाखाली पोलिस निरीक्षक नितीन पगार अधिक तपास करत आहेत.

गुन्ह्याची व्याप्ती वाढणार

दागिन्यांच्या पैशातून मालमत्ता घेतल्याचा दावा फिर्यादीत करण्यात आला आहे. शहरातील दोन नामवंत सराफ व्यावसायिकांच्या कुटुंबावर पुन्हा गुन्हा नोंद झाल्याने या प्रकरणाची व्याप्ती वाढण्याची शक्यता आहे. त्यादृष्टीने पोलिस अधिक तपास करत आहेत.