Nashik Crime News : अखेर भद्रकाली पोलिसांना सापडला तडीपार कोकणी; आदेशाचे उल्‍लंघन केल्‍याने गुन्‍हा दाखल

Nashik Crime News : तडीपार केलेले असताना आदेशांचे उल्‍लंघन करत शहरात वावर असलेल्‍या संशयित अब्‍दुल लतीफ कोकणी याला भद्रकाली पोलिसांनी अखेर अटक केली आहे. गेल्‍या मंगळवारी (ता.१२) जिल्‍हाधिकारी कार्यालयातील नाशिक मंडळाधिकाऱ्यांच्‍या दालनात त्‍याने गोंधळ घातला होता. यानंतर तालुका तलाठी संघाने जिल्हाधिकाऱ्यांना निवेदन देत कारवाईची मागणी केली होती. (Nashik Crime Bhadrakali police finally found Tadipar Konkani marathi news)

शहरातून तडीपार केलेले असताना अब्दुल लतीफ यासीन कोकणी याने मंगळवारी (ता.१२) जिल्हाधिकारी कार्यालयातील नाशिक मंडळाधिकाऱ्यांच्या दालनात गोंधळ घातल्‍याचा प्रकार घडला होता. खरेदी-विक्री व्यवहार, वारस, बोजा दाखल करणे, बोजा कमी करणे यांसह नोंदीवर तडीपार अब्दुल लतीफ यासीन कोकणी हा एकाच नमुन्यातील हरकत अर्ज गठ्ठा पद्धतीने देत असल्‍याचे त्‍याच्‍याविरोधात केलेल्‍या तक्रारीत म्‍हटले होते.

त्‍याच्‍या या कृत्‍यामुळे तक्रार नोंदीचे प्रमाण वाढून कामकाजात अडचण येत असल्‍याचेही तक्रारीत म्‍हटले होते. कोकणी हा तक्रार रजिस्टरच्या सुनावणीला हजर राहत नाही. हजर राहिले तरी संबंधित मंडळ अधिकाऱ्यांशी वाद घालून अरेरावी करतो. मंगळवारी (ता.१२) त्‍याने नाशिक मंडळाधिकाऱ्यांच्या दालनातही अरेरावी केली. (latest marathi news)

तो गुन्हेगारी प्रवृत्तीचे असल्याने त्यांच्याकडून महसूल अधिकारी, कर्मचाऱ्यांवर हल्ला होण्याची शक्यता आहे. त्यामुळे त्‍याच्‍यावरील हद्दपार कारवाईची कडक अंमलबजावणी करावी, अशी मागणी संघातर्फे केली होती. या घटनेच्‍या तीन दिवसांनंतर शनिवारी (ता.१६) रात्री सव्वा आठच्‍या सुमारास संशयित अब्‍दुल लतीफ कोकणी याला कोकणीपुरा येथून अटक केली आहे.

पोलिस उपायुक्‍तांनी आदेश पारीत करत २९ डिसेंबर २०२३ पासून नाशिक शहर पोलिस आयुक्‍तालय व नाशिक ग्रामीण भागातून दीड वर्षांसाठी हद्दपार केले होते. तरीही त्‍याने कोणाचीही पूर्वपरवानगी न घेता हद्दपार आदेश उल्‍लंघन करून शहरात वावरताना आढळल्‍याचे पोलिस अंमलदार अविनाश थेटे यांच्‍या दिलेल्‍या फिर्यादीत म्‍हटले आहे. भद्रकाली पोलिस ठाण्यात त्‍याच्‍याविरोधात गुन्‍हा दाखल करताना पोलिसांनी रात्री उशिरा त्‍याला अटक केली.