Nashik Bribe Crime : म्हाडाच्या लाचखोर लिपिकाला 4 वर्षे सक्तमजुरीची शिक्षा!

Nashik News : अहमदनगर येथील हुडकोतील गाळा नावावर करण्यासाठी तीन हजारांची लाच स्वीकारणाऱ्या म्हाडाच्या लाचखोर वरिष्ठ लिपिकाला नाशिक जिल्हा न्यायालयाने चार वर्षे सक्तमजुरीची शिक्षा आणि १० हजारांचा दंड ठोठावला आहे. कैलास भिकाजी शेळके (५४, रा. श्रीनाथ कृपा, हरिकुलनगर, पंचक, जेल रोड ) असे लाचखोर आरोपीचे नाव आहे. (Nashik Crime Bribery clerk of MHADA sentenced to 4 years hard labour)

अहमदनगर येथील तक्रारदार अशोक बकोरे यांचे वडिलांच्या नावे अहमदनगर येथे हुडकोत गाळा (क्रमांक ६८४) होता. तो गाळा तक्रारदारांच्या नावावर अभिहस्तांतरण (ट्रान्सफर) करायचा होता. त्यासाठी २२ मार्च २०१६ ला नाशिक गृहनिर्माण व क्षेत्र विकास मंडळ कार्यालयातील (म्हाडा) वरिष्ठ लिपिकाने तीन हजार रुपयांच्या लाचेची मागणी केली होती.

यासंदर्भात तक्रारदाराने लाचलुचपत प्रतिबंधक विभागाकडे तक्रार केली असता, पथकाने २२ मार्च २०१६ ला सायंकाळी पावणे पाचच्या सुमारास गडकरी चौकातील म्हाडा कार्यालयातच लाचेची रक्कम स्वीकारताना अटक केली होती. (latest marathi news)

याप्रकरणी मुंबई नाका पोलिसात गुन्हा दाखल करण्यात आला होता. खटल्याची सुनावणी जिल्हा सत्र न्यायाधीश जे. एम. दळवी यांच्या समोर झाली. सरकार पक्षातर्फे सरकारी अभियोक्ता सचिन गोरवाडकर यांनी कामकाज पाहिले.

न्यायालयाने लाचखोर आरोपी शेळके यास दोषी ठरविले आणि ४ वर्षे सक्तमजुरी व १० हजार रुपये दंडाची शिक्षा ठोठावली आहे. या गुन्ह्याचा तपास तत्कालीन पोलिस निरीक्षक बाळासाहेब बडे यांनी केला. तर, पैरवी अधिकारी म्हणून पोलिस निरीक्षक संदीप घुगे, हवालदार प्रदीप काळोगे, महिला अंमलदार ज्योती पाटील यांनी पाठपुरावा केला.