Nashik Bribe Crime : महावितरणच्या लाचखोर उपकार्यकारी अभियंत्याला पोलीस कोठडी; एक लाखांची स्वीकारली होती लाच

Nashik Bribe Crime : पिंपळगाव बसवंत येथे व्यावसायिकाकडून १ लाख रुपयांची लाच स्वीकारणाऱ्या वीज वितरण कंपनीच्या उपकार्यकारी अभियंत्याला न्यायालयाने तीन दिवसांची पोलीस कोठडी सुनावली आहे. दरम्यान, या अभियंत्याच्या घरझडतीतून लाचलुचपत पथकाच्या हाती काय सापडले हे मात्र समजू शकलेले नाही. तसेच, येवल्यात लाचखोरीप्रकरणी अटक करण्यात आलेल्या दोघांना दोन दिवसांची पोलीस कोठडी सुनावण्यात आली आहे. (Nashik Crime Bribery sub executive engineer of Mahavitaran jailed)

किसन भीमराव कोपनर (४४, रा. पार्क साईड, आडगाव शिवार, नाशिक) असे महावितरण कंपनीतील उपकार्यकारी अभियंत्याचे नाव आहे. पिंपळगाव बसवंत येथील व्यावसायिकाचे इलेक्ट्रिक मीटर काढून घेऊन त्याठिकाणी इंडस्ट्रीयल इलेक्ट्रिकल मीटर बसवून देण्याच्या मोबदल्यात एक लाखांच्या लाचेची मागणी केली आणि शुक्रवारी (ता.५) पंचासमक्ष स्वीकारली.

याप्रकरणी लाचलुचपत प्रतिबंधक विभागाच्या पथकाने लाचखोर कोपनर यास रंगेहाथ अटक करीत पिंपळगाव बसवंत पोलिसात गुन्हा दाखल केला. कोपनर यांना न्यायालयात हजर केले असता, त्यांना न्यायालयाने तीन दिवसांची पोलीस कोठडी सुनावली आहे. (latest marathi news)

त्याचप्रमाणे, येवला येथील गटविकास अधिकारी मच्छिंद्र धस यासही शुक्रवारी (ता.५) २० हजार रुपयांची लाच स्वीकारताना लाचलुचपत प्रतिबंधक विभागाने अटक केली होती. तसेच, भूसंपादनाचा ना हरकत दाखल्यासाठी ७०० रुपयांची लाच स्वीकारताना उपविभागीय अधिकारी कार्यालयातील अव्वल कारकून जनार्दन रहाटळ यास लाचलुचपत प्रतिबंधक पथकाने शुक्रवारी (ता.५) अटक केली होती. या दोघा लाचखोरांना न्यायालयाने दोन दिवसांची पोलीस कोठडी सुनावली आहे.