Nashik Crime : त्र्यंबक रोडवर कार अडवून बापलेकास मारहाण करीत लुटले; दुचाकीस्वारांवर जबरी चोरीचा गुन्हा दाखल

सातपूर : त्र्यंबक रोडवरील पपया नर्सरी भागात कार अडवून बापलेकास मारहाण करीत दुचाकीस्वारांनी लुटल्याची घटना घडली. या घटनेत काहीतरी हत्यार व दगडाचा वापर करण्यात आल्याने कारमधील दोघे जखमी झाले असून, त्यांच्या ताब्यातून सुमारे २५ हजारांची रोकड बळजबरीने हिसकावून नेत भामट्यांनी पोबारा केला. याबाबत सातपूर पोलिस ठाण्यात जबरी चोरीचा गुन्हा दाखल झाला. (father son beaten robbed by blocking car on Trimbak Road)

पोलिसांनी दिलेल्या माहितीनुसार शुभम व्यकंडी माडे (२७, रा. मुकुंदवाडी, छत्रपत्री संभाजीनगर) यांनी फिर्याद दिली. शुभम माडे व त्यांचे वडील पालघर येथे गेले होते. गुरुवारी (ता. १) सायंकाळच्या सुमारास बापलेक त्र्यंबक रोडने स्विफ्ट कारमधून (एमएच २० एफडी ५५१२) परतीचा प्रवास करीत असताना ही घटना घडली.

पपया नर्सरी भागात काळ्या रंगाच्या दुचाकीवर आलेल्या दोघांनी कार अडवून माडे बापलेकास शिवीगाळ केली. या वेळी खिडकीतून काहीतरी हत्याराने व दगडाने बापलेकास मारहाण करण्यात आली. (latest marathi news)

या घटनेत जखमी बापलेकाच्या खिशातील सुमारे २४ हजार ५०० रुपयांची रोकड व महत्त्वाची कागदपत्र बळजबरीने काढून घेत पोबारा केला असून, जाताना कारला दगड मारल्याने काच फुटून नुकसान झाले आहे. उपनिरीक्षक न्याहळदे अधिक तपास करीत आहेत.