Nashik Crime News : अंबासन येथे डोंगराच्या पायथ्याशी जुगाराचा अड्डा; एक जण ताब्यात

Nashik Crime News : मानूर (ता. बागलाण) येथे उपविभागीय पोलिस अधिकारी नितिन गणापूरे यांच्या पथकाने डोंगराच्या कडेला आंब्याच्या झाडाखाली राजरोज सुरू असलेल्या मटका जुगार अड्ड्यावर छापा टाकून जुगाराचे साहित्य, रोख रक्कम जप्त केले. संबंधिताविरोधात जुगार कायद्यानुसार गुन्हा दाखल करण्यात आला. एकाला ताब्यात घेण्यात आले असून पिंपळनेर येथील एकाच्या सांगण्यानुसार परिसरातील अनाधिकृत व्यवसायांचे समूळ नष्ट करण्यासाठी पोलिस प्रशासनाने कंबर कसली आहे. (Gambling den at foothills in Ambasan One person in custody )

गुप्त माहितीनुसार मानूर येथे दोन ते तीन जण मिलन कल्याण नावाचा मटका जुगार खेळवत असल्याचे समजले. पोलिस पथकाने छापा टाकण्यासाठी दोन पंचांच्या मदतीने खासगी वाहनातून थेट मानूर गाठत डोंगरांच्या अलीकडेच वाहन उभे करून पायी गेले. आंब्याच्या झाडाखाली मोकळ्या जागेत दोन जण आकड्यावर पैसे लावून जुगार खेळ खेळताना आढळून आले. साध्या वेशातील पोलिसांनी अनाधिकृत चालणाऱ्या मटका अड्ड्यावर छापा टाकून पकडले, दुसऱ्या एकाने तेथून पळ काढला.

पकडलेल्या जुगार चालकाला पोलिसांनी विश्वासात घेऊन संपूर्ण माहिती घेतली असता राजू मुन्नालाल भोई (रा. पिपळनेर, ता.साक्री) असे सांगितले. मालक सागर कैलास जयस्वाल (रा. पिपळनेर, ता. साक्री) यांच्या सांगण्यावरून मटका चालवत असल्याची कबुली दिली. त्याची झडती घेतली असता दहा हजार एकशेवीस रूपये, आकडे लिहिण्यासाठी पेन, दोन पुस्तक व कार्बन असा ऐवज मिळून आला. अवैध व्यावसायिकांवर कारवाई सुरूच राहणार असे उपविभागीय पोलिस आधिकारी नितीन गणापुरे यांनी सागितले.