Nashik Crime News : अवैद्य मद्य वाहतूक करणाऱ्या मुख्य संशयिताला बेड्या; सिल्वासा येथून घेतले ताब्यात

Nashik Crime News : अवैद्य मद्य वाहतूक करणाऱ्या ट्रकचा पाठलाग करताना झालेल्या अपघातात पोलिसाचा मृत्यू झाला असून, या प्रकरणी पोलिसांनी दोन संशयितांना यापूर्वीच ताब्यात घेतले होते. मुख्य संशयित, मुख्य डीलर राहुल ज्योती सहाणी (वय ४४, रा. नारोली रोड, सिल्वासा, गुजरात) याच्या नाशिक ग्रामीण पोलिसांनी सिल्वासा येथून मुसक्या आवळल्या आहेत. संशयिताने घरातील एसी डकमधून उडी मारून जंगलात पळ काढला होता. मात्र पोलिसांनी पाठलाग करीत त्याला पकडले. ( Main suspect of illicit liquor trafficking jail by police)

राज्य उत्पादन शुल्क विभागाचे भरारी पथक अवैध मद्य वाहतूक करण्याच्या संशयावरून सोमवारी (ता. ८) मध्यरात्री क्रेटा वाहनाचा पाठलाग करीत होते. त्या वेळी क्रेटा वाहनचालकाने शासकीय वाहनावरील चालक कैलास कसबे व इतर अंमलदाराचा खून करण्याच्या हेतूने शासकीय वाहनास धडक दिली. त्यात कसबे यांचा मृत्यू झाला, तर तिघे गंभीर जखमी झाले.

याप्रकरणी गुजरातमधून अश्पाक अली मोहमंद शेख (वय २२) यास पकडले. क्रेटाचालक देवीश कांतिलाल पटेल (वय ३७) हा चांदवड न्यायालयात हजर झाला होता. या दोघांनाही न्यायालयाने १८ जुलैपर्यंत पोलिस कोठडी सुनावली आहे. स्थानिक गुन्हे शाखेचे पोलिस निरीक्षक राजू सुर्वे यांच्या पथकाने ही कामगिरी केली.

चिखलातून सिनेस्टाइल पाठलाग

संशयित राहुल यास पोलिसांची चाहूल लागताच तो घरात बसविलेल्या एसीच्या डकमधून घराबाहेर पडला. त्यासाठी त्याने साडी बांधून पाठीमागील बाजूने जंगलात पळ काढला. उपनिरीक्षक घुगे, हवालदार दीपक गुंजाळ, शांताराम घुगे, नाइक प्रकाश कासार, रमेश चव्हाण, देवा गोविंद, नरेंद्र कोळी यांच्या पथकाने जंगलातील चिखलातून सिनेस्टाइल पाठलाग करून राहुलला पकडले. राहुलविरोधात गुजरात राज्यात अवैध मद्य वाहतूक प्रकरणी सात गुन्हे दाखल आहेत.