Nashik Crime News : बनावट दस्तऐवज करून भूमाफियांनी लाटला भूखंड; नाशिक रोड पोलिसात डॉक्टरांसह 5 जणांविरोधात गुन्हा

Nashik News : मखमलाबाद परिसरातील प्लॉटचे बनावट दस्तऐवज तयार करून दुय्यम निबंधकांसमोर बनावट महिला उभी करून प्लॉटच बळकावण्याचा प्रकार उघडकीस आला आहे. याप्रकरणी तीन डॉक्टरांसह संशयित महिला व एक व्यक्ती अशा पाच जणांविरोधात नाशिकरोड पोलिसात फसवणुकीचा गुन्हा दाखल झाला आहे. (manner of grabbing plot itself by creating fake documents)

नितीन लखीचंद बिर्ला, सुलभा अमोल पवार, गजेंद्र रमेश अहिरराव, स्वाती रवींद्र वाघ, प्रशांत मधुकर पाटील अशी संशयितांची नावे आहेत. भारती प्रकाश अहिरे (रा. नाशिक रोड) यांच्या फिर्यादीनुसार, त्यांचे पती सेवानिवृत्त अधिकारी असून, त्यांनी १९८६ मध्ये मखमलाबाद शिवारात प्लॉट खरेदी केला होता.

हा प्लॉट भारती अहिरे यांच्या नावावर असून, त्याचा सातबाराही होता. दरम्यान, एप्रिल २०२४ मध्ये त्यांच्या मुलाने प्लॉटचा ऑनलाइन सातबारा मिळविण्याचा प्रयत्न केला असता, तो मिळाला नाही. त्यामुळे त्यांनी मखमलाबाद येथील तलाठीकडे त्यासंदर्भात चौकशी केली असता तो विक्री झाल्याचे निदर्शनास आल्याने अहिरे कुटुंबीयांना धक्का बसला. (latest marathi news)

यासंदर्भातील कागदपत्रांची पडताळणी केली असता, हा प्लॉट संशयित नितीन बिर्ला, सुलभा पवार आणि गजेंद्र अहिरराव यांनी खरेदी केल्याचे समोर आले. त्यासाठी संशयितांनी बनावट दस्तऐवज तयार केले आहेत. तसेच, संशयितांनी स्वाती वाघ या बनावट महिलेस भारती अहिरे म्हणून उभे केले.

बनावट दस्तावर असलेली भारती अहिरे यांची स्वाक्षरी खोटी असून, ती इंग्रजीत आहे. तर भारती अहिरे या मराठीत स्वाक्षरी करतात. यासंदर्भात दुय्यम निबंधक कार्यालयातील प्लॉटचे मूळ दस्तऐवजही गायब झाल्याचे समोर आले आहे. फसवणूक झाल्याचे लक्षात येताच यासंदर्भात नाशिक रोड पोलिसात फिर्याद देत संशयितांविरोधात फसवणुकीचा गुन्हा दाखल झाला आहे.