Nashik Crime News : साईटवरून स्टाईल्सचे बॉक्स चोरणार्या दोघांना अटक

Nashik Crime News : पाथर्डी फाटा परिसरात सुरू असलेल्या नवीन इमारतीच्या बांधकामाच्या ठिकाणी असलेल्या स्टाईल्स फरशींचे बॉक्स चोरी करणार्या दोघा संशयितांच्या मुसक्या आवळण्यात आल्या आहेत. शहर गुन्हेशाखेच्या युनिट दोनच्या पथकाने सदरची कामगिरी केली असून, दोघांचा शोध सुरू आहे. संशयितांकडून चोरीचा मुद्देमालही जप्त केला आहे. (Nashik Crime)

युवराज मोहन मते (३०, रा. पाथर्डी गाव, नाशिक), सचिन देवराम तळपाडे (२९, रा. सोमठाणे, ता. अकोले, जि. अहमदनगर) अशी अटक करण्यात आलेल्या दोघा संशयितांची नावे असून, भगवान खोकले (रा. पाचपट्टा, ता. अकोले, जि. अहमदनगर), सोनू राठोड (रा. पाथर्डी गाव, नाशिक) हे दोघे पसार असून, पोलीस त्यांचा शोध घेत आहेत.

घनश्याम नथुराम कुमावत (रा. डीजीपीनगर, वडाळारोड) यांच्या फिर्यादीनुसार, कुमावत यांनी पाथर्डी फाटा परिसरात सुरू असलेल्या बांधकाम इमारतीला स्टाईल्स फरशा पुरविण्याचा ठेका घेतलेला होता.

या बांधकाम इमारतीच्या ठिकाणी काम करणार्या चौघा संशयितांनी नोव्हेंबर २०२३ ते फेब्रुवारी २०२४ या दरम्यान राघव हाईटस्‌ या बांधकाम साईटवर असलेल्या सुमारे ४८ हजार रुपयांच्या स्टाईल्सची चोरी केल्या होत्या. याप्रकरणी इंदिरानगर पोलिसात गुन्हा दाखल आहे.

सदरील गुन्ह्याचा शहर गुन्हेशाखेचे युनिट दोनचे पथक समांतर तपास करीत होते. त्यावेळी पथकाचे हवालदार राजेंद्र घुमरे यांना काही संशयित हे स्टाईल्स चोरत असल्याची खबर मिळाली होती. त्यानुसार पथकाने संशयति मते, तळपाडे या दोघांना सापळा रचून अटक केली. पोलिसी खाक्या दाखवित चौकशी केली असता संशयितांनी स्टाईल्स चोरीची कबुली दिली.

संशयित खोकले व राठोड यांच्या साथीने स्टाईल्स चोरी केल्याचीही कबुली दिली. अटक केलेल्या संशयितांकडून ४५ हजारांच्या चोरीच्या स्टाईल्स जप्त केल्या असून, त्यांना तपासाकामी इंदिरानगर पोलिसांच्या ताब्यात देण्यात आले आहे.

सदरची कामगिरी युनिट दोनचे वरिष्ठ पोलीस निरीक्षक सोहन माछरे यांच्या मार्गदर्शनाखाली उपनिरीक्षक संदेश पाडवी, हवालदार राजेंद्र घुमरे, चंद्रकांत गवळी, संजय सानप, विजय वरंधळ, परमेश्वर दराडे यांनी बजावली.