Nashik Crime : सिडकोतील गोळीबार प्रकरणात शेवाळे, शिंदे यांची कारागृहात रवानगी

नाशिक : सिडकोत ॲड. प्रशांत जाधव यांच्यावरील गोळीबार प्रकरणातील संशयित अंकुश शेवाळे, प्रसाद शिंदे या दोघांना न्यायालयीन कोठडी सुनावल्याने त्यांची नाशिक रोड मध्यवर्ती कारागृहात रवानगी करण्यात आली आहे. दरम्यान, या गुन्ह्याचा कटकारस्थान करणारा संशयित दीपक बडगुजर अद्यापही पोलिसांच्या हाती लागलेला नाही. रिपाइंचे पदाधिकारी व ॲड. प्रशांत जाधव यांच्यावर १४ फेब्रुवारी २०२२ रोजी रात्री दोन मोपेडवरून आलेल्या संशयितांनी गोळीबार केला होता. ( Shewale and Shinde sent to jail in cidco firing case)

यात ते थोडक्यात बचावले होते. या प्रकरणी अंबड पोलिसात गुन्हा दाखल आहे. दोन वर्षांनी याप्रकरणाची उकल झाली आहे. आत्तापर्यंत सहा संशयितांना अटक करण्यात आली आहे. शिवसेनाचा (उबाठा) कार्यकर्ता अंकुश शेवाळे, प्रसाद शिंदे या दोघांच्या पोलिस कोठडीची मुदत संपल्याने त्यांना शनिवारी (ता २१) न्यायालयात आणण्यात आले असता, न्यायालयाने त्यांची रवानगी नाशिक रोड मध्यवर्ती कारागृहात केली.

तर, मयूर बेद, बारक्या व सूर्यतळ हे यापूर्वीच मध्यवर्ती कारागृहात रवाना झाले आहेत. या प्रकरणात दीपक बडगुजर याचे नाव समोर आले आहे. परंतु तो पसार आहे. त्याचा पोलिस शोध घेत आहेत परंतु अद्याप त्याचा ठावठिकाणा लागू शकलेला नाही. दीपक परदेशात असल्याची चर्चा मात्र आहे. याबाबत पोलिस काय भूमिका घेतात याकडे आता लक्ष लागून आहे.