Nashik Crime News : घरातून लहान मुल पळविण्याचा प्रयत्न! अंबड पोलिसांकडून संशयित महिलेचा शोध सुरू

Nashik News : सिडकोतील विजयनगर परिसरामध्ये घरातील झोळीमधील लहान मूल पळविण्याचा प्रयत्न मुलाच्या आईच्या सतर्कतेमुळे फसला. संशयित महिलेविरोधात अंबड पोलिसात गुन्हा दाखल करण्यात आला असून, पोलिस तिचा शोध घेत आहेत. (Trying to run away children from home Ambad police are searching for suspect woman)

पोलिसांनी दिलेल्या माहितीनुसार, सदरची घटना बुधवारी (ता. ३) दुपारी साडेबाराला ही घडली आहे. मुलाच्या आईचे घरातील कामकाज आटोपल्यानंतर तिने झोळीमध्ये मुलाला टाकले आणि बाथरुममध्ये गेली. त्याचवेळी झोळीतील मुलाचा रडण्याचा आवाज तिला ऐकू आला. त्यामुळे तिने बाथरूममधून बाहेर धावत आली असता, त्यावेळी ४० ते ४५ वयोगटातील एक जाडजुड महिला हातात झोळीतील मूल घेऊन उभी होती.

पंजाबी सलवार व तोंडावर पांढरा रुमाल बांधलेल्या संशयित महिलेच्या हातातील मुल तिने हिसकावून घेतले. परंतु भितीपोटी तिच्या तोंडातून आवाज निघाला नाही. तर संशयित महिलेनेही लगेच पळ काढला. सदरची बाब तक्रारदार महिलेने संध्याकाळी तिचा पती घरी आल्यानंतर सांगितली. त्यांनी अंबड पोलिस ठाणे गाठून आपबिती सांगितली.

वरिष्ठ पोलिस निरीक्षक दिलीप ठाकूर यांनी घटनेचे गांभीर्य ओळखून घटनास्थळी भेट दिली. त्यावेळी परिसरात कुठेही सीसीटीव्ही आढळून आले नाही. याप्रकरणी अंबड पोलिसात गुन्हा दाखल करण्यात आला असून, संशयित महिलेचा पोलिस शोध घेत आहेत. (latest marathi news)

नागरिकांनी केले आश्चर्य व्यक्त

पोलिसांनी घटनास्थळाची पाहणी केली असता, त्याठिकाणी अरुंद गल्ल्या असून आसपास कोठेही सीसीटीव्ही कॅमेरे नाहीत. पोलिसांनी आसपासच्या नागरिकांकडे चौकशी केली असता, ज्यावेळी घटना घडली त्यावेळी मुलाच्या आईने आरडाओरडा केला असता तरी नागरिकांनी जमा होत संशयित महिलेला पकडले असते असे सांगितले.

परंतु तसे काही झाले नाही. तसेच, तक्रारदार महिलेच्या वर्णनानुसार अशी महिलाही कोणी पाहिली नाही, असे परिसरातील नागरिक व महिलांनी सांगितले. त्याचप्रमाणे अशी घटना घडल्याबद्दलच अनेकांनी आश्चर्य व्यक्त केले आहे. तरीही पोलिस संशयित महिलेचा शोध घेण्यासाठी प्रयत्न करीत असल्याचे वरिष्ठ पोलिस निरीक्षक ठाकूर यांनी सांगितले.