Nashik Crime News : महिला पोलिस कर्मचाऱ्यास तरुणाकडून मारहाणीचा प्रकार! दहिपुलावरील घटना

जुने नाशिक : महिला पोलिस कर्मचाऱ्याशी तरुणांकडून वाद घालून धक्काबुक्की करत मारहाण करण्याची घटना सोमवारी (ता. ८) दुपारी घडली. भद्रकाली पोलिस ठाण्यात गुन्हा दाखल करण्याचे काम सुरू होते. महिला पोलिस कर्मचारी दहिपूल परिसरातून जाताना दुचाकीचा धक्का लागला. त्यातून तरुणाने त्यांच्याशी वाद घातला. (woman police officer was beaten up by young man)

त्यांना धक्काबुक्की करत मारहाण केली. यामुळे त्या जखमी झाल्या. त्यांनी त्या कार्यरत असलेल्या पोलिस पथकातील वरिष्ठांना याबाबतची माहिती दिली. वरिष्ठांनी घटनेचे गांभीर्य लक्षात घेता त्वरित पोलिस पथकास घटनास्थळी पोचण्याच्या सूचना केल्या. पथकाने घटनास्थळी दाखल होत घटनेची माहिती घेतली.

घटनास्थळावरून संशयित महेश दौलत गुरिया (वय २५, रा. जगताप मळा नाशिक रोड) यास ताब्यात घेतले. त्याची चौकशी करून घडलेल्या प्रकाराची माहिती घेतली. चौकशी पूर्ण झाल्यानंतर त्यास पुढील चौकशीसाठी भद्रकाली पोलिसांच्या ताब्यात दिले. पीडित महिला पोलिस कर्मचाऱ्याच्या तक्रारीवरून उशिरापर्यंत संशयिताविरुद्ध गुन्हा दाखल करण्याचे काम सुरू होते.

महिला पोलिस कर्मचाऱ्यास मारहाण केली नाही. त्या मारत असताना बचावासाठी हात वर केला असता त्यांच्या तोंडास हात लागल्याचे संशयिताने सांगितले. घडलेल्या घटनेने काही वेळ दहिपूल परिसरात बघ्यांची गर्दी जमली होती. (latest marathi news)

मारहाणीची दुसरी घटना

महिला पोलिस कर्मचाऱ्यास मारहाण करण्याची भद्रकाली पोलिस ठाणे हद्दीतील ही दुसरी घटना आहे. काही महिन्यांपूर्वी अशाचप्रकारे शालिमार येथे गेलेल्या महिला पोलिस कर्मचाऱ्यास रस्त्यावर दुकान लावणाऱ्या एका संशयित तरुणाने मारहाण केली होती. वरिष्ठांना माहिती मिळताच त्यांनी संशयितास ताब्यात घेत कारवाई केली होती.

महापालिकेच्या माध्यमातून आठ दिवस सतत त्याठिकाणी अतिक्रमण निर्मूलन मोहीम राबवून रस्त्यावर व्यवसाय करणाऱ्या गुंडप्रवृत्तींना धडा शिकवला होता. त्यानंतर सोमवार (ता.८) अशाच घटनेची पुनरावृत्ती दहिपूल परिसरात झाली.