Nashik News : ब्रह्मगिरीवर ‘एससी सरकार’चा स्तंभ; जिल्हाधिकारी जलज शर्मांचे गुन्हा दाखल करण्याचे आदेश

Nashik News : लोकसभा निवडणुकीचे वातावरण तापत असताना जिल्ह्यात समांतर सरकारचा दावा करणाऱ्या ‘एसी सरकार’ विरोधात गुन्हा दाखल करण्याचे आदेश जिल्हाधिकारी जलज शर्मा यांनी दिले आहेत. ब्रिटनच्या राणीला मानणारा एसी सरकार समूह भारत सरकारला मानत नाही. त्र्यंबकेश्वरमध्ये ‘एसी सरकार’ने स्तंभ उभारत थेट ब्रह्मगिरी पर्वतावर दावा केला आहे. (nashik District Collector Jalaj Sharma has ordered to file case against sc government claiming parallel government in district marathi news)

नाशिक-गुजरातच्या सीमा भागात डांग परिसरात हा समूह सक्रिय आहे. त्यांनी स्तंभ उभारल्यानंतर त्र्यंबकेश्वर पोलिस ठाण्यात अज्ञात व्यक्तीविरोधात गुन्हा दाखल झाला. ‘एसी’ने उभारलेल्या स्तंभावर अशोक स्तंभासह अनाकलनीय भाषेतील मजकूर आहे. ब्रह्मगिरी पर्वत वन विभागाच्या अखत्यारित येतो. मात्र, वन विभागाकडे याची कोणतीही माहिती उपलब्ध नाही.  (latest marathi news)

काही दिवसांपूर्वी गडचिरोली भागात या ‘एसी सरकार’ला मानणाऱ्या अनुयायांनी मतदान करू नका, असे तेथील ग्रामस्थांना सांगितले. त्यानंतर पुन्हा हे सरकार चर्चेत आले आहे. त्याचे धागेदोरे आता थेट त्र्यंबकेश्वरपर्यंत पोचले आहेत. ब्रह्मगिरी पर्वतावर सार्वजनिक ठिकाणी विनापरवाना फलक लावून सार्वजनिक शांतता भंग करणे, तसेच आदिवासी समाजात गैरसमज निर्माण करण्याचा प्रयत्न करणे, या कलमांतर्गत अज्ञात व्यक्तींच्या विरुद्ध त्र्यंबकेश्वर पोलिस ठाण्यात गुन्हा दाखल झाला आहे.