नाशिक जिल्ह्यात ५० टक्के पर्जन्यवृष्टी; तर धरणांमध्ये ५२ टक्के साठा

नाशिक : जिल्ह्यात आतापर्यंत ५०.५८ टक्के पर्जन्यवृष्टी झाली असून, सात मोठ्या व १७ मध्यम अशा २४ प्रकल्पांमधील साठा ५२ टक्के झाला आहे. नाशिककरांचे पिण्याचे पाणी अवलंबून असलेल्या गंगापूरमध्ये ७६, तर दारणामध्ये ७५ टक्के साठा झाला आहे. याशिवाय आळंदी, कडवा, हरणबारीमधील साठा ७० टक्क्यांच्या पुढे पोचला आहे.

भावली आणि वालदेवी धरण भरले आहे. नांदूरमध्यमेश्‍वरमध्ये ९८ टक्के साठा ठेवण्यात आला असून, दारणातून एक हजार २९४, भावलीतून १३५, वालदेवीमधून ६५ क्यूसेक विसर्ग सुरू आहे. आळंदीमध्ये ७८, कडवामध्ये ७०, हरणबारीमध्ये ८६ टक्के जलसाठा झाला आहे. याशिवाय इतर धरणांतील जलसाठ्याची टक्केवारी अशी : कश्‍यपी- ५०, गौतमी गोदावरी- ५९, पालखेड- ६१, करंजवण- २५, वाघाड- ५२, ओझरखेड- २६, मुकणे- ५२, भोजापूर- १५, चणकापूर- ४५, केळझर- ५०, गिरणा- ३८, पुनंद- ४७, माणिकपुंज- ५३. गेल्या वर्षी ३ ऑगस्टला जलसाठा ५२ टक्के होता. गेल्या वर्षीपेक्षा यंदा गंगापूर, कश्‍यपी, गौतमी गोदावरी, पालखेड, करंजवण, वाघाड, मुकणे, वालदेवी, कडवा, चणकापूर, हरणबारी, केळझर प्रकल्पांत अधिकचा, तर ओझरखेड, पुणेगाव, तिसगाव, भोजापूर, गिरणा, माणिकपुंज प्रकल्पांत कमी जलसाठा झाला आहे.

आदिवासी पट्ट्यात पावसाच्या सरी

इगतपुरी, पेठ, त्र्यंबकेश्‍वर, सुरगाणा या आदिवासी तालुक्यांत पावसाच्या सरी कोसळत आहेत. नाशिक शहर आणि परिसरात ढगाळ हवामान व पाऊस अधूनमधून सरींच्या स्वरूपात हजेरी लावत आहे. आज सकाळी आठला संपलेल्या चोवीस तासात नाशिक तालुक्यात पाच, इगतपुरीमध्ये २३, दिंडोरीत दोन, पेठमध्ये १९, कळवणमध्ये एक, सुरगाण्यात ८.१, निफाडमध्ये १.४ मिलिमीटर पावसाची नोंद झाली आहे.

तालुकानिहाय पावसाची स्थिती (टक्केवारी)

तालुका आतापर्यंतचा पाऊस तालुका आतापर्यंतचा पाऊस

नाशिक २९.४१ कळवण ३३.७७

इगतपुरी ६४.०३ बागलाण ४६.५०

दिंडोरी ३८.२८ सुरगाणा ५७.८१

पेठ ६३.९७ देवळा ४३.७७

त्र्यंबकेश्‍वर ५०.६४ निफाड ५३.०३

मालेगाव ४४.३४ सिन्नर ३३.१२

नांदगाव ३४.६० येवला २५.२७

चांदवड २४.७४ एकूण-गेल्या वर्षी ४८.७४