Dr. Babasaheb Ambedkar Jayanti : डीजेच्या दणदणाटात मिरवणूक; कडेकोट पोलिस बंदोबस्त

Dr. Babasaheb Ambedkar Jayanti : डॉ. बाबासाहेब आंबेडकर जयंतीनिमित्ताने भद्रकालीतील मोठा राजवाडा येथून मोठ्या उत्साहात मिरवणुकीला प्रारंभ झाला. मात्र ध्वनीमर्यादेचे बिनधास्तपणे उल्लंघन करीत मंडळांनी डीजेचा वापर केला. मिरवणुकीसाठी पोलिसांचा कडेकोट बंदोबस्त ठेवण्यात आला होता. जुने नाशिकमधील मोठा राजवाडा येथून डॉ. बाबासाहेब आंबेडकर जयंती मिरवणुकीला प्रारंभ झाला. (nashik Dr Babasaheb Ambedkar Jayanti celebrated with heavy police security in city)

पोलिस आयुक्त संदीप कर्णिक यांच्या मार्गदर्शनाखाली शहर गुन्हेशाखेचे उपायुक्त प्रशांत बच्छाव, परिमंडळ एकचे उपायुक्त किरणकुमार चव्हाण, सहायक आयुक्त सिदधेश्वर धुमाळ, युनिट एकचे वरिष्ठ पोलिस निरीक्षक मधुकर कड, भद्रकालीचे वरिष्ठ पोलिस निरीक्षक गजेंद्र पाटील, सायबर पोलिस ठाण्याचे वरिष्ठ पोलिस निरीक्षक रियाज शेख यांच्यासह पोलिसांचा मोठा फौजफाटा तैनात करण्यात आलेला होता.

मिरवणुकीमध्ये सहभागी झालेल्या मंडळांसमवेत पोलिस अधिकार्यांचे एक पथक तैनात करण्यात आले होते. तरीही मंडळांकडून धीम्यागतीने वाटचाल सुरू होती. तसेच, ध्वनीमर्यादेचे सर्रासपणे उल्लंघन करण्यात आले. मंडळांना डीजेऐवजी पारंपरिक वाद्यांचा वापर करण्याच्य सूचना देण्यात आल्या होत्या.  (latest marathi news)

परंतु सर्रासपणे डीजेचा वापर करण्यात आला. मिरवणूक मार्गांवरही मंडळांकडून उभारण्यात आलेल्या स्टेजवर डीजे लावण्यात येऊन त्यावर तरुणाई थिरकत होती. ध्वनीमर्यादेचे उल्लंघन करणार्या मंडळांविरोधात पोलीस काय भूमिका घेत, याकडे आता अनेकांचे लक्ष लागून आहे.

बाऊंसर्स कोणासाठी?

डॉ. बाबासाहेब आंबेडकर जयंती मिरवणुकीमध्ये यंदा पहिल्यांदा मोठ्या संख्येने असलेले बाऊंसर्स लक्ष वेधून घेत होते. सराईत गुन्हेगाराच्या अवतीभवती बाऊंसर्सच्या घोळक्यामुळे सर्वसामान्यांना मिरवणुकीत चालताना मनस्तापाला सामोरे जावे लागत होते. एवढेच नव्हे तर पोलिसांसमोर शहरातील काही सराईत गुन्हेगार हे बाऊंसर्स घेऊन मिरवणूकीमध्ये वावरत होते. त्यातून या सराईत गुन्हेगारांनी समाजाला की पोलिसांना काय संदेश दिला असावा, अशीच चर्चा उपस्थितांमध्ये होती. तसेच अशा प्रवृत्तींना पोलिसांनी वेळीच अटकाव घातला पाहिजे अशीही अपेक्षा अनेकांनी व्यक्त केली.