Nashik News : एकदंतनगर ते गंगेश्‍वर कॉलनी रस्त्याला कोणी वाली आहे का? संतप्त नागरिकांचा प्रशासनाला सवाल

Nashik News : अंबड शिवारातील एकदंतनगर ते गंगेश्‍वरकॉलनीपर्यंतच्या रस्त्यावर ठिकठिकाणी खड्डे निर्माण झाल्याने पावसाळ्यात छोटे-मोठे अपघात घडण्याचे प्रमाण वाढले आहे. यामुळे अनेकदा लहान मुले व ज्येष्ठ नागरिक पाय घसरुन पडल्याने जायबंदी झाल्याच्या घटना घडल्या आहेत. (potholes on road from Ekdanta Nagar to Gangeshwar Colony in Ambad Shivar)

या रस्त्याकडे संबंधित नगरसेवकांचे दुर्लक्ष असल्याने ‘या रस्त्याला कोणी वाली आहे की नाही?’ असा सवाल परिसरातील संतप्त नागरिकांकडून विचारला जात आहे. सन २०१७ पासून एकदंतनगर ते गंगेश्‍वरकॉलनीपर्यंतच्या रस्त्याची अवस्था बिकट आहे. या रस्त्याचे काम थातूरमातूर केल्याने पहिल्या पावसातच रस्त्यावरील खडी उघडी पडली.

त्यानंतर परिसरातील रहिवाशांनी सदर रस्त्याच्या दुरुस्तीची अनेकदा मागणी केली. परंतु त्या मागणीची ना नगरसेवकाने दखल घेतली, ना महानगरपालिकेने. मग दाद मागावी कोणाकडे असा प्रश्‍न नागरिकांच्या मनात उपस्थित होत आहे. पावसाळ्यात या रस्त्यावरील खड्ड्यांमध्ये पाणी साचत असते, तसेच जागोजागी चिखल होत आहे. (latest marathi news)

तसेच इलेक्ट्रीक अथवा पाण्याच्या पाईपलाईनसाठी खोदण्यात आलेले खड्डे न बुजविल्यामुळे पावसाळा सुरु झाल्यापासून आतापर्यंत लहान मुले व ज्येष्ठ नागरिक असे दोन ते तीन जण पाय घसरुन अथवा खड्ड्यात पडून जायबंदी झाल्याच्या घटना घडल्या आहेत.

गेल्या सात वर्षांपासून या रस्त्याची दूरवस्था असल्याने नगरसेवकांना हे दिसत नाही का अशा संतप्त प्रतिक्रिया परिसरात उमटत असून स्थानिक रहिवाशांमध्ये तीव्र संताप व्यक्त केला जात आहे. सदर रस्त्याच्या दुरुस्तीचे काम महानगरपालिकेकडून तत्काळ करण्यात यावे व रहिवाशांना दिलासा द्यावा, अशी मागणी परिसरातून होत आहे.