नाशिक : देवळाली कॅम्पच्या गल्लीतून ई- रिक्षा उचलणार कचरा

देवळाली : देवळाली कॅम्प स्वच्छता अभियानात देशपातळीवर चौथा, तर राज्य पातळीवर प्रथम क्रमांक पटकावणाऱ्या देवळाली कॅन्टोन्मेंट बोर्डाने घंटा गाड्यांबरोबरच आता कचरा संकलनासाठी ई- रिक्षाचा प्रयोग सुरू केला आहे. संपूर्ण देशात देवळालीची ओळख आरोग्यदायी वातावरण, स्वच्छ व सुंदर शहर अशी असल्याने ती जपण्यासाठी कॅन्टोन्मेंट प्रशासनाकडून सातत्याने वेगवेगळे उपक्रम राबवून स्वच्छतेला प्राधान्य दिले जात आहे.

‘स्मार्ट कॅन्टोन्मेंट’ कडे वाटचाल करणाऱ्या प्रशासनाने तीन वर्षापासून अकरा घंटागाड्यांच्या माध्यमातून सर्व आठही वॉर्डात सुका व ओला कचरा संकलनाचा उपक्रम राबवताना जास्ती- जास्त घरापर्यंत पोचण्याचा प्रयत्न केला. मात्र, काही गल्लीबोळातील घरापर्यंत पोचणे शक्य होत नसल्याचे निदर्शनास आल्यानंतर गतवर्षी सायकल रिक्षाचा प्रयोग करण्यात आला.

मात्र, यंदा ई- रिक्षा व कार्ट यांच्या माध्यमातून अशा घरापर्यंत पोचणार आहेत. या कामासाठी स्वतंत्र दोन वाहनांची तजवीज केली आहे. त्याचा शुभारंभ बोर्डाचे मुख्य कार्यकारी अधिकारी डॉ. राहुल गजभिये यांच्या मार्गदर्शनाखाली प्रशासकीय अधिकारी उमेश गोरवाडकर यांच्या हस्ते करण्यात आला. या वेळी आरोग्य अधिक्षक अमन गुप्ता, आरोग्य निरीक्षक शिवराज चव्हाण, पर्यवेक्षक सुभाष काडेकर आदी उपस्थित होते.

ज्या भागात घंटागाडी जाऊ शकत नाही, त्या ठिकाणी ही गाडी जाऊन कचरा संकलित करेल. याशिवाय ओला व सुका कचऱ्यासाठी या गाडीत देखील स्वतंत्र व्यवस्था करण्यात आली आहे. सदर गाडी ही चार्जिंगवर असल्याने तिचा पेट्रोल- डिझेलचा खर्च तसेच कर्मचाऱ्यांचा वेळदेखील वाचणार आहे.