Nashik Fire Accident: धावत्या चारचाकीने घेतला पेट; भोळे कुटुंबीय थोडक्यात बचावले

जुने नाशिक : सारडा सर्कल येथे मंगळवार (ता. २१) सकाळी अकराच्या सुमारास धावत्या मारुती ओमनी चारचाकीने अचानक पेट घेतला.

चालकाच्या प्रसंगाधवनाने भोळे कुटुंबीय थोडक्यात बचावले. आगीत वाहन जळून खाक झाले. घटनेमुळे काही वेळ वाहतूक कोंडी झाली होती. (Nashik Fire Accident running four wheeler caught fire gullible family narrowly escaped)

पिंपळगाव बसवंत येथील गणेश भोळे पत्नी सोनाली आणि त्यांचा चार महिन्याचा मुलगा, असे तिघे (एमएच- १८- डब्ल्यू- ३७१८) चारचाकीतून सारडा सर्कल परिसरातून घरी परतत होते.

मागील बाजूने धूर येत असल्याचे नागरिकांनी त्यांना सांगितले. जागेवरच चारचाकी थांबवून तिघांनी वाहनांपासून दूर पळ काढला. काही क्षणातच आगीचा भडका उडाला. संपूर्ण चारचाकी जळून राख झाली.

रस्त्यावरून धावत्या अन्य वाहनांनी जागेवरच वाहने थांबून ठेवल्याने लांबच लांब वाहनांच्या रांगा लागून वाहतूक कोंडी झाली होती. दरम्यान समीर शेख यांनी अग्निशामक विभागास घटनेची माहिती दिली. वाहतूक कोंडीमुळे अग्निशामक बंबास घटनास्थळी पोचण्यास अडचण निर्माण झाली.

अग्निशामक कर्मचाऱ्यांनी बंबातून खाली उतरत वाहतूक कोंडी सोडवली. त्यानंतर बंब घटनास्थळी दाखल होऊ शकला. आगीवर पाण्याचा मारा करत अवघ्या दहा ते पंधरा मिनिटात नियंत्रण मिळवण्यात आले.

भोळे कुटुंबीय जिल्हा रुग्णालयात त्यांच्या चार महिन्याच्या मुलास डोस देण्यासाठी आले होते. डोस देऊन घरी परतत असताना घटना घडली. बॅटरीमध्ये शॉर्टसर्किट झाल्याने आग लागण्याची शक्यता वर्तविण्यात आली.

आग लागताच कारची विक्री

सारडा सर्कल येथे लागलेल्या आगीत नुकसान झालेल्या चारचाकीच्या आगीवर अग्निशामक विभागाकडून नियंत्रण मिळवताच. त्या चारचाकीची अवघ्या काही वेळेतच सारडा सर्कल भागातीलच भंगार व्यावसायिकास विक्री करण्यात आली.

या घटनेने परिसरातील नागरिकांनी आश्चर्य व्यक्त केले. चारचाकी विक्री करण्याची घाई का करण्यात आली असावी, असे प्रश्न उपस्थित झाले. विशेष म्हणजे पोलिस ठाण्यातदेखील घटनेची नोंद करण्यात आली नाही. त्यामुळे नागरिकांचा आणखी संशय बळावत होता.