Nashik Fraud Crime : इथेनॉल कंपनीत गुंतवणूकीतून दाम्पत्याला 2 कोटींचा गंडा

नाशिक : इथेनॉल कंपनी खरेदीसाठी भागीदारी केल्यानंतर, त्यात आर्थिक गुंतवणूक केली. मात्र त्यानंतर, कंपनीतील भागीदार रद्द करण्यास भाग पाडून संशयितांनी दाम्पत्याला तब्बल २ कोटी ११ लाखांना गंडा घातल्याप्रकरणी म्हसरुळ पोलिसात गुन्हा दाखल करण्यात आला आहे. संशयितांमध्ये महाराष्ट्र बँकेच्या व्यवस्थापकाचाही समावेश आहे. (Couple cheated 2 crore by investing in ethanol company )

मुकेश राठोड, त्याची पत्नी, सौरभ राठोड, प्रणव राठोड, राहुल पवार, सीए रॉबिन, महाराष्ट्र बँकेचे व्यवस्थापक गिरीश शेट्टी, हायड्रोस कुट्टी अशी संशयितांची नावे आहेत. रेवती अश्वीन मोरे (रा कलानगर, म्हसरुळ) यांच्या फिर्यादीनुसार, ऑगस्ट २०१८ मध्ये संशयित मुकेश राठोड याने आरसीलच्या इथेनॉल कंपनी खरेदीसाठी भागीदारी करण्यात आली. त्यासाठी मोरे दाम्पत्याने पैशांसह दागदागिने व स्थावर मालमत्ता तारण ठेवून कंपनी सुरू करण्यासाठी आर्थिक गुंतवणूक केली.

मात्र नंतर संशयितांनी मोरे यांना भागीदारी रद्द करण्यासाठी भाग पाडले. त्यासाठी कॅन्सल धनादेशावर स्वाक्षरी घेतली परंतु गुंतवणूक केलेली रक्कम परत केली नाही. कंपनी सुरळीत सुरू झाल्यानंतरही मोरे यांची २ कोटीं ११ लाख २० हजार रुपयांची रक्कम परत न करता संशयितांनी त्यांची फसवणूक केली. तसेच सेटलमेंटची कागदपत्रे बनावट तयार करून ते खरे भासविण्याचा प्रयत्न केला आहे. याप्रकरणी म्हसरुळ पोलिसात फसवणुकीचा गुन्हा दाखल करण्यात आला असून, वरिष्ठ पोलीस निरीक्षक सुभाष ढवळे हे तपास करीत आहेत.