Nashik News : अनुदानित आश्रमशाळांच्या शिक्षणसेवक मानधनात वाढ

Nashik News : शालेय शिक्षण विभागाने फेब्रुवारी २०२३ मध्ये राज्यातील प्राथमिक, माध्यमिक, उच्च माध्यमिक व कनिष्ठ महाविद्यालय आणि अध्यापक विद्यालयातील शिक्षणसेवकांच्या मानधनात वाढीचा निर्णय घेतला आहे. त्याच धर्तीवर आदिवासी विकास विभागाने स्वयंसेवी संस्थांमार्फत चालविण्यात येणाऱ्या ५५६ अनुदानित आश्रमशाळांतील तब्बल ३३४ शिक्षणसेवकांच्या मानधनात वाढीचा निर्णय घेतला. ही वाढ १ जानेवारी २०२३ पासून लागू असणार आहे. (Increase in teaching staff remuneration of aided ashram schools )

आदिवासी विकास विभागामार्फत चालविण्यात येणाऱ्या आश्रमशाळांमधील शिक्षणसेवकांचे मानधन व शालेय शिक्षण विभागांतर्गत असणाऱ्या शिक्षणसेवकांचे मानधन यात समानता राहावी, तसेच दरम्यानच्या कालावधीत वाढलेली महागाई, राज्य स्थानिक स्वराज्य संस्था, तसेच अनुदानित प्राथमिक, माध्यमिक, उच्च माध्यमिक शाळेतील शिक्षकांना सातव्या वेतन आयोगाच्या शिफारशीनुसार सुधारित वेतनश्रेणी लागू केली आहे. मात्र, शिक्षणसेवकांच्या मानधनात सन २०१२ पासून वाढ झालेली नाही. (latest marathi news)

उच्च न्यायालयाच्या औरंगाबाद खंडपीठाने रिट याचिकेवरील ३० जून २०२२ ला शिक्षणसेवकांना मिळणारे मानधन कमीत कमी कोणत्याही प्रकारच्या उद्योगातील वर्ग-४ च्या कर्मचाऱ्यास देय किमान वेतनाएवढे सुधारित करावे, मानधनाचे निश्चित दर चार वर्षांतून किमान एकदा सुधारित करावेत, तसेच शिक्षणसेवकांना १५ ते २० हजार रुपये मानधन अदा करावे, असे आदेश दिले आहेत. त्यानुसार प्राथमिक तसेच माध्यमिक शिक्षणसेवकांच्या मानधनात १० हजार, तर उच्च माध्यमिक शिक्षणसेवकांच्या मानधनात ११ हजार रुपयांची वाढ होणार आहे.

असे मिळणार मानधन

पद संवर्ग आधीचे मानधन सुधारित मानधन

प्राथमिक शिक्षणसेवक ६ हजार १६ हजार

माध्यमिक शिक्षणसेवक ८ हजार १८ हजार

उच्च माध्यमिक शिक्षणसेवक ९ हजार २० हजार