Nashik Gangapur Dam : पितृपक्षानंतरचं गंगापूर धरणाचे जलपूजन; महापालिकेकडून नवरात्रोत्सवाचा मुहूर्त निश्‍चित

नाशिक : शहराला पाणीपुरवठा करणारे गंगापूर धरण पूर्ण क्षमेतेने भरल्याने परंपरेनुसार प्रशासनामार्फत गंगापूर धरणात जलपूजन केले जाणार आहे. परंतु जलपूजनाचा मुहूर्त पितृपक्षानंतर निश्‍चित करण्यात आला आहे. पितृपक्षानंतर शुभ कामे करण्याची बाब सुचविण्यात आल्यानंतर निर्णय घेण्यात आला आहे. यंदाही प्रशासकीय राजवट असल्याने आयुक्त डॉ. अशोक करंजकर यांच्या हस्ते गंगापूर धरणावर विधीवत जलपूजन होईल. (Jal Pujan Municipal Corporation of Gangapur Dam fixed time of Navratri festival )

नाशिक शहराला प्रामुख्याने गंगापूर धरण व काही प्रमाणात मुकणे आणि दारणा धरणातून पाणीपुरवठा केला जातो. गंगापूर धरण भरल्यानंतर दरवर्षी धरणक्षेत्रावर जाऊन महापौरांच्या हस्ते जलपूजन केले जाते. प्रथम महापौर स्व. शांतारामबापू वावरे यांच्यापासून ही जलपूजनाची परंपरा आहे. तसेच दरवर्षी गंगापूर धरण ७० टक्के भरल्यानंतर महापालिकेकडून जलपूजन केले जाते. यंदा जलपूजनाचा प्रशासनाला विसर पडला. पावसाने उघडीप दिल्यानंतर जलपूजनाचा विषय अनंत चतुर्दशीच्या दिवशी समोर आला.

परंतु पितृपक्ष सुरू होत असल्याने या काळात पूजन करणे योग्य नसल्याचे सांगण्यात आल्यानंतर नवरात्रोत्सवात जलपूजन केले जाणार आहे. १५ ऑक्टोबरला पावसाळा संपल्याची अधिकृत घोषणा होते. त्यापूर्वी जलपूजन केले जाणार आहे. महापालिकेत प्रशासकीय राजवट आहे. त्यामुळे आयुक्तांच्या हस्ते नारळ वाहून तसेच विधीवत पूजा करून जलपूजन केले जाणार आहे. त्यासाठी पाणीपुरवठा विभागाने जलपूजनाची तयारी सुरू केली आहे. (latest marathi news)

प्रशासनाकडून सारवासारव

शुभ-अशुभ या अंधश्रद्धेच्या बाबी असल्याने टीका होण्याची दाट शक्यता आहे. त्यामुळे प्रशासनाकडून सारवासारव करण्यात आली. प्रथम पाणीपुरवठ्याच्या समस्या सोडविण्यास प्राधान्य दिले जाईल. पंधरा दिवसात किरकोळ दुरुस्ती केली जाईल. त्यानंतर परंपरेप्रमाणे जलपूजन केले जाणार असल्याचे सांगण्यात आले.

धरणातील जलसाठा (दशलक्ष घनफुटात)

धरण जलसाठा

गंगापूर समूह ९०४२

दारणा ७०६०

मुकणे ६६५०