Nashik News: जामशेत लघुपाटबंधारे प्रकल्प योजनेला मंजुरी! तालुक्यातील 227 हेक्टर क्षेत्र येणार सिंचनाखाली

कळवण : तालुक्यातील जामशेत लघुपाटबंधारे प्रकल्प योजनेला मुख्यमंत्री एकनाथ शिंदे यांच्या अध्यक्षतेखाली झालेल्या राज्य मंत्रीमंडळाच्या बैठकीत मान्यता देण्यात आल्याची माहिती आमदार नितीन पवार यांनी दिली. या योजनेमुळे तालुक्यातील २२७ हेक्टर क्षेत्र येणार सिंचनाखाली येणार आहे. योजनेला मान्यता मिळताच अभोणा चौफुलीवर जामेशत परिसरातील शेतकऱ्यांनी जल्लोष केला. (Nashik Jamshet Small Irrigation Project Plan Approved An area of ​​227 hectares in taluka will come under irrigation marathi news)

दिवंगत आमदार ए.टी.पवार यांनी २०११ मध्ये नाशिकच्या नियोजन व जलविज्ञान कार्यालयाकडून जामशेत लघुपाटबंधारे प्रकल्पास पाणी उपलब्धतेचे प्रमाणपत्र मिळवून जामशेत लघुपाटबंधारे प्रकल्पास प्रशासकीय मान्यता मिळावी यासाठी राज्य शासनाकडे प्रस्ताव सादर केला होता.

मागील १३ वर्षांपासून जामशेत लपा योजनेचा प्रस्ताव राज्य सरकारकडे प्रलंबित होता. याबाबत आमदार नितीन पवार यांनी ओतूर बरोबर जामशेत लपा योजना संदर्भात उपमुख्यमंत्री अजित पवार यांच्या अध्यक्षतेखाली बैठका घेऊन या योजनेचे महत्त्व लक्षात आणून दिले होते. (Latest Marathi News)

उपमुख्यमंत्री अजित पवार यांनी संबंधित विभागाला तत्काळ अहवाल सादर करून प्रशासकीय मान्यतेसाठी प्रस्ताव सादर करण्याच्या सूचना दिल्या होत्या. शासनस्तरावरील अटी पूर्तता करीत सदरचा प्रस्ताव मुख्यमंत्री एकनाथ शिंदे यांच्या अध्यक्षतेखाली सोमवारी (ता.२६) झालेल्या मंत्रीमंडळाच्या बैठकीत प्रस्तावास मान्यता देण्यात आली. या योजनेमुळे तालुक्यातील जामशेत, मोहमुख, अंबुर्डी बुद्रूक, अंबुर्डी खुर्द, भगूर्डी, दत्तनगर या परिसराला शेतकऱ्यांना लाभ होणार आहे.

"जामशेत लपा प्रकल्पाचे स्व. ए. टी. पवार यांनी पाहिलेले स्वप्न पूर्ण करावयाचे असल्यामुळे या प्रश्नासंदर्भात मंत्रालयात उपमुख्यमंत्री अजित पवार यांच्या उपस्थितीत बैठका घेतल्या. आज मंत्रीमंडळाच्या बैठकीत मान्यता मिळाल्याने शेतकऱ्यांना याचा लाभ होणार आहे."

- नितीन पवार, आमदार