Nashik News : ॲड. नितीन ठाकरे यांना शिवसेनेची साद; शिवसेना नेते संजय राऊत यांनी जाहीर भाषणातून पक्षप्रवेशाचे दिले निमंत्रण

Nashik News : जिल्ह्यातील नामांकित मराठा विद्याप्रसारक समाज शिक्षण संस्थेचे सरचिटणीस ॲड. नितीन ठाकरे यांची लोकसभा निवडणूक लढण्याची संधी हुकल्याने त्यांना आता विधानसभा निवडणुकीचे वेध लागले आहेत. याच पार्श्‍वभूमीवर शिवसेना उद्धव बाळासाहेब ठाकरे पक्षाचे नेते खासदार संजय राऊत यांनी नाशिकमध्ये त्यांना मशाल हाती घेऊन आपला राजकीय मार्ग सुकर करण्याची साद घातली आहे. (Nashik News)

विशेष म्हणजे महाविकास आघाडीकडून इच्छुक असलेल्या उमेदवारांसमोरच त्यांनी हा प्रस्ताव ठेवल्याने इच्छुकांच्या गोटात अस्वस्थता पसरलेली दिसते. लोकसभा निवडणुकीत राज्यात महाविकास आघाडीला ३१ जागांवर अभूतपूर्व यश मिळाल्याने नेत्यांचा आत्मविश्‍वास दुणावला आहे. नाशिक विभाग शिक्षक मतदारसंघाच्या निवडणुकीत महाविकास आघाडीच्या उमेदवाराच्या प्रचारार्थ रविवारी (ता. २३) नाशिकमध्ये मेळावा घेण्यात आला.

त्या वेळी खासदार राऊत यांनी जाहीर भाषणातून ॲड. ठाकरेंना पक्षप्रवेशाचे निमंत्रणच दिले. ते म्हणाले, की गेल्या लोकसभा निवडणुकीत ‘मविप्र’ समाज शिक्षण संस्थेने शुभशकुन देत नाशिक व धुळ्यातील दोन सदस्यांना दिल्लीत पाठविले. आता शिक्षकांचे प्रश्‍न मांडण्यासाठी ॲड. गुळवे हे तिसरे प्रतिनिधी सज्ज झाले आहेत. लोकसभेपासून विजयाचा सुरू झालेला सिलसिला येत्या विधानसभेतही कायम राहील. (latest marathi news)

त्यामुळे विधानसभा निवडणुकीपूर्वी ॲड. ठाकरे तुम्ही शिवसेना प्रवेशाचा निर्णय घ्या. शिवसेनेची भगवी शाल परिधान केल्यावर तुमचा राजकीय मार्ग अधिक सुकर होईल, असेही ते म्हणाले. माजी आमदार वसंत गिते, जिल्हाप्रमुख सुधाकर बडगुजर.

शहराध्यक्ष विलास शिंदे यांच्या उपस्थितीत खासदार राऊतांनी हा प्रस्ताव ठेवल्याने इच्छुकांच्या गोटात अस्वस्थता पसरली आहे. ॲड. ठाकरे यांनी शिवसेनेचा प्रस्ताव मान्य केल्यास भविष्यात नाशिक शहरात विधानसभेच्या इच्छुकांमध्ये चांगलीच रस्सीखेच होण्याची शक्यता आहे.

ॲड. ठाकरेंना साद घालण्याचे कारण

लोकसभा निवडणुकीत ॲड. नितीन ठाकरे इच्छुक होते. त्यांनी महायुतीसह महाविकास आघाडीच्या पक्षांकडेही उमेदवारीची मागणी केली. त्यांचा प्रस्ताव येईपर्यंत फार उशीर झालेला होता, त्यामुळे बंडखोरी करून उमेदवारी करण्यापेक्षा त्यांनी दिल्लीचा मार्ग सोडून मुंबईच्या दिशेने आपली गाडी वळवली आहे. आतापासून आपली दावेदारी टिकवून ठेवण्याचे त्यांचे प्रयत्न दिसतात. यामुळेच त्यांना महाविकास आघाडीकडून विधानसभेची उमेदवारी देण्याचा विचार पुढे आला आणि खासदार राऊत यांनी हा प्रस्ताव ठेवल्याची चर्चा आता सुरू झाली आहे.