Nashik News : रामसेतूवरील पुराच्या पाण्यात‘सेल्फी’ साठी जीव धोक्यात

Nashik News : गंगापूर धरणातून गोदावरी नदीपात्रात पाण्याचा विसर्ग सुरू आहे. त्यामुळे पावसाने जरी उघडीप दिली असली तरीही गोदाघाट अद्यापही पाण्याखाली आहे. तर, दुतोंडी मारुतीनजीकच्या रामसेतूवर पाणी आहे. या पुलावर पाण्याच्या प्रवाहास वेग असतानाही त्याठिकाणी तरुणाई जीव धोक्यात घालून मोबाईलमध्ये ‘सेल्फी’ घेताना दिसून येत आहे. शुक्रवारी (ता.२) मध्यरात्रीपासून शहर आणि गंगापूर धरणक्षेत्रात मुसळधार पाऊस झाला. (Life in danger for Selfie in flood waters of Ram Setu )

त्यामुळे रविवारी (ता.४) गोदावरी नदीला यंदाच्या मोसमातील पहिला पूर आला. रविवारीच दुपारी गोदाकाटावर धार्मिक विधी केल्यानंतर पुराच्या पाण्यात पाय धुण्यासाठी गेलेला तरुण इंजिनिअर तोल जाऊन वाहून गेल्याची घटना घडली होती. सोमवारी (ता.५) पावसाने उघडीप दिल्याने पूर ओसरला असला तरीही गोदाघाटावरील रामसेतू अजून पाण्याखाली आहे.

असे असतानाही गोदावरीचा पुर पाहण्यासाठी आलेली नागरिक व तरुणाई ही रामसेतूवरील पुराच्या पाण्यात जाऊन मोबाईलमध्ये सेल्फी घेण्याचा आनंद घेत आहे. परंतु पुराच्या पाण्याचा प्रवाह अजूनही जोरदार असून, या पुलाला उंच कठडे नाहीत. त्यामुळे पुराच्या पाण्यात पाय सरकून निसटल्यास थेट गोदापात्रात वाहून जाण्याची व जीव गमावण्याचीच शक्यता अधिक आहे. मात्र तरीही पुराच्या पाण्यातील सेल्फी काढण्यासाठी काहीजण नको ते धाडस करताना दिसून येत आहेत.