Nashik News : अतिरिक्त आयुक्तांच्या तपासणीत स्वच्छता कर्मचारी चक्क गैरहजर!

मालेगाव : महापालिका आयुक्त रवींद्र जाधव यांच्या मार्गदर्शनाखाली अतिरिक्त आयुक्त नूतन खाडे यांनी संगमेश्‍वर, द्याने, अब्दुल्ला नगर या तीन स्वच्छता हजेरी सेंटरची पाहणी करून हजेरी मस्टर तपासले. यात त्यांना अनेक कर्मचारी गैरहजर असल्याचे आढळले. तसेच, स्वच्छतेचा ठेका दिलेल्या दिग्विजय इंटरप्राईजेस या कंपनीचे कर्मचारी देखील गैरहजर असल्याचे तपासणीत दिसून आले. (Malegaon sanitation workers were absent in Additional Commissioner inspection)

संबंधित कर्मचाऱ्यांना नोटिसा बजावण्यात आल्या आहेत. अतिरिक्त आयुक्त श्रीमती खाडे यांनी संगमेश्वर हजेरी सेंटरवर भेट दिली. ४९ पैकी फक्त २३ कर्मचारी हे प्रत्यक्ष हजेरीसाठी उपस्थित होते. दोन कर्मचारी सतत गैरहजर राहत असल्याचे त्यांच्या निदर्शनास आले. गैरहजर कर्मचाऱ्यांना तत्काळ नोटीस बजावण्याचे आदेश दिले.

शहरात स्वच्छतेचा ठेका दिग्विजय इंटरप्राईजेस या कंपनीला दिला आहे. अतिरिक्त आयुक्तांनी द्याने व अब्दुल्लानगर या स्वच्छता हजेरी सेंटरची देखील पाहणी केली. या ठिकाणी दिग्विजय एंटरप्राईजेसचे अनेक कर्मचारी गैरहजर होते. कंपनीच्या पर्यवेक्षकांना संबंधित कर्मचाऱ्यांना नोटिसा देण्यास सांगितले. (latest marathi news)

गैरहजर कर्मचाऱ्यांसंदर्भात स्वच्छता निरीक्षक व मुकादमांना जाब विचारण्यात आला. यासंदर्भात अहवाल सादर करा. सातत्याने गैरहजर राहणाऱ्या व काम व्यवस्थित न करणाऱ्या कर्मचाऱ्यांवर सक्तीने कारवाई करण्याचे आदेश त्यांनी दिले. श्रीमती खाडे यांनी दोन दिवसापुर्वी महापालिकेच्या शाळांना भेटी दिल्या होत्या. यावेळी देखील शिक्षक मोबाईल पाहण्यात दंग असल्याचे त्यांना आढळून आले.

"महापालिका हद्दीतील सर्व हजेरी सेंटरवर अनुपस्थित राहणाऱ्या कर्मचाऱ्यांवर कारवाई करण्याच्या सूचना देण्यात आल्या आहेत. दिग्विजय एंटरप्राईजेस व स्वच्छता कर्मचाऱ्यांनी नेमून दिलेले काम जबाबदारीने करावे. महापालिकेच्या शाळांमधील शिक्षकांनी विद्यार्थ्यांच्या अध्यायनावर लक्ष केंद्रीत करुन गुणवत्ता वाढवावी. कामचुकार कर्मचाऱ्यांवर कारवाई केली जाईल." - रवींद्र जाधव, आयुक्त, मालेगाव महापालिका