Nashik News : दमणगंगा-वैतरणा-देव नदी नदीजोडच्या 5 हजार 710 कोटींच्या प्रकल्पाला मंजुरी : आमदार कोकाटे

सिन्नर : नाशिक जिल्ह्यातील दुष्काळी सिन्नर तालुक्यासह मराठवाड्यासाठी उपयुक्त ठरणारा ‘दमणगंगा-एकदरे-गोदावरी’ आणि ‘दमणगंगा-वैतरणा-गोदावरी’ या दोन नदीजोड प्रकल्पांना सोमवारी (ता. १४) राज्य मंत्रिमंडळाच्या बैठकीत मान्यता देण्यात आली.

हे दोन्ही नदीजोड प्रकल्प १५ हजार ७१० कोटी रुपयांचे असून, उपमुख्यमंत्री अजित पवार यांच्या पुढाकाराने हा प्रश्न मार्गी लागला आहे. या निर्णयामुळे सिन्नर तालुक्याच्या कपाळावरचा अवर्षणग्रस्ताचा कलंक पुसला जाणार असल्याचे आमदार माणिकराव कोकाटे यांनी सांगितले. (Damanganga Vaitrana Dev river link project)

सोमवारी (ता. १४) झालेल्या राज्य मंत्रिमंडळाच्या बैठकीत ‘दमणगंगा-एकदरे-गोदावरी’सह ‘दमणगंगा-वैतरणा-गोदावरी’ नदीजोड प्रकल्पाला मान्यता देण्यात आली. ‘दमणगंगा-वैतरणा-गोदावरी’ नदी जोड प्रकल्पासाठी १३ हजार ४९७ कोटी २४ लाख रुपये प्रस्तावाला मान्यता देण्यात आली आहे.

या प्रकल्पामुळे कडवा आणि देव नदीसाठी १६०.९७ दलघमी पाणी उपलब्ध होणार असून, ३३ हजार ११० हेक्टर क्षेत्र सिंचनाखाली येणार आहे. दमणगंगा-वैतरणा लिंकचे पाणी कडवा धरण व तेथून सिन्नरची जीवनवाहिनी असलेल्या देव नदीच्या उगमस्थानी टाकण्यात येणार आहे. या प्रकल्पामुळे देव नदी बारमाही प्रवाहित होण्यास मदत होईल. (latest marathi news)

त्याचा थेट फायदा सिन्नर तालुक्यातील उद्योग-व्यवसाय व शेती सिंचनासाठी होणार आहे. ‘दमणगंगा-एकदरे-गोदावरी’ नदीजोड प्रकल्पासाठी दोन हजार २१३ कोटी ५३ लाख रुपये प्रस्तावाला मान्यता देण्यात आली आहे. या प्रकल्पामुळे १०० दलघमी पाणी उपलब्ध होणार असून, त्यातून मराठवाड्यातील १२ हजार ९९८ हेक्टर अतिरिक्त क्षेत्र सिंचनाखाली येणार आहे.

"सिन्नरकरांसाठी महत्त्वाच्या असलेल्या दमणगंगा-वैतरणा लिंक प्रकल्पाच्या मंजुरीसाठी उपमुख्यमंत्री अजित पवार यांनी व्यक्तिगत पातळीवर पाठपुरावा केला होता. हा प्रकल्प पूर्णत्वास गेल्यानंतर दमणगंगा, वैतरणाचे समुद्राकडे वाहून जाणारे पाणी देव नदीसाठी उपलब्ध होणार आहे. सिन्नरकरांच्या कपाळावर असलेला दुष्काळाचा कलंक पुसून टाकण्यासाठी हा प्रकल्प अत्यंत महत्त्वाचा आहे."-माणिकराव कोकाटे, आमदार (सिन्नर)